– Folk blir redde for å miste husa sine
Tidlegare kommunepolitikar Åshild Øygarden (Ap) seier at den auka eigedomsskatten i Bø skremmer eldre folk i bygda. Som fortalt i Varden, kan det bety auke i eigedomsskatten på over 50 prosent for huseigarar i Bø.
▶ BØ
– Eg har høyrt om ein som er redd for at han at ikkje klarer å behalde huset sitt. For ein einsleg minstepensjonist kan den auka skatten bli tøff. Mange veit ikkje korleis den nye skatten slår ut, og dette skaper uro.
Slik uro er uheldig. Kommunen bør informere om utslaga, seier Åshild Øygarden. Ho har vore vararepresentant til kommunestyret og medlem av utval for helse og velferd samt rådet for funksjonshemma.
Mange små bekkar
Ho reagerer på at auka eigedomsskatt blir sett opp mot sjukeheimsplassar.
- Det skaper også frykt. Kommunen bør i staden kutte på andre utgifter, som til dømes bruk av konsulentar. Dei tilsette i kommunen er såpass laerde at dei bør klare jobben sjølv. Dette handlar ikkje om dei store beløpa, men med mange utgiftspostar vert det mange pengar, ifølgje Åshild Øygarden
– Ap er vanlegvis positiv til eigedomsskatt?
- Ja, slik skatt er nødvendig å ha i kommunen, men eg meiner at nok er nok. Det går ei grense. Dei som leiger hus må også rekne med påslag i leiga som følgje av auka eigedomsskatt. Mange av desse har heller ikkje toppinntekter. Den auka eigedomsskatten på 4,5 promille kan kommunen berre ta i 2020. Neste år må satsen ned til 4 promille. Derfor utset politikarane berre problemet.
Ta kontakt
Bø-ordførar Borgar Torbjørn Kaasa (Sp) seier i ein kommentar til Varden at det ikkje er ønskjeleg at folk er engstelege.
– Dei som lurar på eigedomsskatten, kan ta kontakt med kommunen. Det er også høve til å klage, seier Bø-ordføraren