Slik skal det nye fylket kutte utslepp
Klimagassutsleppa i det nye fylket vårt skal reduserast med 100.000 tonn i året – eller med 60 prosent fram til 2030.
Det opplyste fylkesordførar Terje Riis-Johansen (Sp) på VestTelemarkkonferansen i Vrådal onsdag.
Den vart arrangert for 16. gong med kring 150 deltakarar frå ulike delar av fylket. Temaet i år var det grøne skiftet.
Dødfødd
Riis-Johansen sa at det regionale nivået vil utgjere ein skilnad for å nå målet om å avgrense temperaturstiginga til 1,5 grader.
— Me skal ny byggje eit nytt fylke. Verdiskapinga skjer gjennom ei grøn omstilling, og det me skal leve av om 20 år er knapt funne opp. Det vil vere dødfødd å etablere nye jobbar med CO2-utslepp, understreka fylkesordføraren.
Tiltak
Som viktige tiltak peika han på elektrifisering av bilparken, og med ladestasjonar over heile fylket.
Han ser dette som viktig klimatiltak i distrikta.
– Det er like viktig å ha dette på Dalen som i Skien. Fylkeskommunen skal ha solceller på alle sine bygg, og nye bygningar skal førast opp i tre. Utsleppsfrie byggeplassar er eit anna tiltak for å nå klimamålet, opplyste fylkesordførar Terje RiisJohansen.
Som positivt døme frå naeringslivet i fylket trekte han fram jernproduksjonen ved Ulefos Jernvaerk som har eit CO2-utslepp på ti prosent av det vanlege i bransjen.
Dugnad må til
I paneldebatten etterpå understreka stortingsrepresentant Terje Aasland (Ap) at staten klarer ikkje å nå klimamåla åleine.
– Dugnaden må skje i eit samarbeid mellom staten, fylka, kommunane og naeringslivet. Heile landet må vere med, sa tingmannen frå Telemark.
God distriktspolitikk
Tidlegare politisk medarbeidar i NRK, Bjørn Bø, styrte ordskiftet, der også NHO-direktør Kristin Saga og varaordførar i Tokke, Benedikte Nes (MDG) deltok. Bø konfronterte Nes med kutt i kjøtforbruket.
– Målet er at me skal produsere basert på eigne ressursar, og styrkje produksjonen i distrikta. God klimapolitikk er god distriktspolitikk, sa MDGrepresentanten frå Tokke.
Utmarka viktig
Både Terje Riis-Johansen og Terje Aasland understreka betydinga av utmarksbeite.
– Som stor produsent av storfekjøt har eg nok meir nyansert syn på kjøtforbruket enn de i salen trur. Eg trur ikkje så mange sluttar å ete kjøt, men det går bra om me et ei pølse mindre i veka. Me må ikkje gå frå den eine grøfta til den andre, sa fylkesordførar og tidlegare landbruksminister Terje Riis-Johansen.