Kan tape millionar på mild vinter
Den milde vinteren fører til inntektssvikt for kraftselskapa.
Halvor Ulvenes
▶ TOKKE
— Dersom den låge prisen held seg ut året, betyr det ein brutto inntektssvikt på 40 millionar kroner, seier adm. direktør Ketil Kvaale i Vest-Telemark Kraftlag (VTK).
–Våre prisar er no vesentleg lågare enn det selskapet har budsjettert med. I budsjettet er det kalkulert med ein straumpris på 40 øre per kWh. No ligg den under 20 øre. Me har ein kraftproduksjon på 200 GWh.
Med ein differanse på 20 øre per kwh gjev dette eit brutto inntektstap på 40 millionar kroner på årsbasis, seier Kvaale.
Skatt kompenserer
— Redusert skatt vil kompensere mykje av dette, men det er alltid slik at inntektssvikt gjev tap. Skatten er ikkje på 100 prosent, opplyser han.
Mildvêr, fulle magasin og situasjonen på kontinentet er viktige faktorar for å bestemme den norske straumprisen.
Blir spekulasjonar
Han seier at det no er svaert vanskeleg å berekne inntektstapet for resten av året.
— Det synest likevel opplagt at me ikkje får den budsjetterte prisen på 40 øre. Me kompenserer heller ikkje mykje med ein kald sommar — det betyr lite. Ein tørr sommar, med god plass i magasina, kan derimot føre til prisoppgang, forklarar Kvaale.
Han seier også at situasjonen for kolkraftverka i Tyskland og Polen påverkar den norske straumprisen, men det er ikkje noko som tilseier at dette vil skape prisoppgang her heime med det fyrste.,
Mykje snø i fjellet
Kvaale opplyser at per 1. februar var snømagasinet i Skafså 146 % av normalen (historisk gjennomsnitt). Det er målt som kg/ m² (vassmengde). Over 500 meter er det ein snørik vinter, ifølgje Ketil Kvaale i VTK.
NVE skreiv følgjande om situasjonen på onsdag 12. februar:
— Kraftproduksjonen i Noreg var i førre veke seks prosent høgare enn veka før. Samstundes voks ikkje forbruket like mykje, og difor vart meir kraft eksportert. Kraftprisane sank ytterlegare førre veke og låg gjennomsnittleg på 16 øre/kWh i alle prisområde i Noreg. På sundagen hadde både Midt- og Nord-Noreg ein time med prisar under 5 øre/kWh, hovudsakleg grunna mykje vindkraftproduksjon på kontinentet og i Sverige.