Slutt på eigne karantenereglar
Midt-Telemark kommune droppar eigne reglar om karantene framover. Det avgjorde formannskapet i eit ekstraordinaert møte onsdag ettermiddag.
Møtet vart halde elektronisk på grunn av smittefaren.
Ikkje forlenga
Hastevedtaket til kommuneoverlege Kristin Sekse om eigne karantenereglar for innreise frå nokre fylke gjekk ut onsdag. Dersom vedtaket skulle blitt vidareført, måtte formannskapet forlenge avgjerda.
Kommuneoverlegen sa i si orientering til formannskapet at ho ikkje lenger såg behovet for å ha slike karantenereglar. Sekse meiner at ein må sjå på effekten kontra dei samfunnsmessige skadeverknadene.
Ikkje fagleg grunnlag
– Det er ikkje medisinsk fagleg grunnlag for å føre forskrifta vidare. Tiltaket skal ikkje vere urimeleg. Mi vurdering er at tiltaket har hatt ei viss effekt, men no er behovet mykje mindre enn for to veker sidan, sa kommuneoverlegen. Ho fekk brei støtte av medlemmene i formannskapet. Ingemar Bråten (H) sa at dette er ei veldig rett vurdering. Steinar Saeland (V) var samd i dette, og uttrykte skepsis til å ha reglar i strid med nasjonale retningsliner.
Ris bak spegelen
I møtet kom det også fram at innbyggjarane har oppført seg fornuftig i den situasjonen. Dersom dette skulle endre seg, vil forskrifta kunne bli innført på nytt.
Formannskapet ber derfor om fullmakt frå kommunestyret til å gjennomføre nødvendige hastevedtak. Truleg blir dette avklart ved at kommunestyret får mail om saka, og fattar vedtak i såkalla skriftleg fjernmøte.