Bent opnar pengesekken
HONNØR:Bent
Midt-Telemark formannskap gav onsdag samrøystes fullmakt til å bruke av kapitalen på 15 millionar kroner i det som vert kalla Midt-Telemark Fondet.
Hentar tilbake
Kommunane Midt-Telemark og Nome ytte tidlegare eit lån på 15 millionar kroner til MidtTelemark Energi. På grunn av krisa som følgje av pandemien er det no behov for å hente desse pengane tilbake til fondet for å støtte lokale verksemder.
– Vedtaket er avhengig av godkjenning i kommunestyra i Nome og Midt-Telemark, men det ser eg på som ein rein formalitet, seier Bent Gurholt til Varden.
Ulike krav
I det elektroniske formannskapsmøtet i Midt-Telemark kommune onsdag opplyste Gurholt at det skal ytast maks 50.000 kroner i støtte til kvar bedrift. Eit vilkår er at selskapet som får støtte må vere ramma av krisa og vurderast som levedyktig i minst eitt år framover.
Gurholt opplyser at i neste runde kan det også bli aktuelt å yte seks millionar kroner i lån frå fondet til bedrifter som treng ekstra finansiering.
– Eit slikt tilbod treng politisk godkjenning, seier Bent Gurholt. Han rosar politikarane som opnar for slike bidrag til bedriftene.
Bryr seg
Formannskapsmedlem Borgar Torbjørn Kaasa (Sp) gav på si side honnør til MTNU som no opnar pengesekken.
– Dette er rette verktøyet for oss, og viser at me bryr oss om naeringslivet, sa den tidlegare ordføraren i Bø. Både Ingemar Bråten (H) og varaordførar Ingebjørg Nordbø (MDG) var òg mellom dei som synest denne støtteordninga er fornuftig.