Auka inntektene, men gjekk i minus
Bø blad, som har den nye kommunen i midtfylket som nedslagsfelt, gjekk på ein ny økonomisk smell i 2019. Avisa har tapt over ein halv million kroner i løpet av dei to siste åra.
Det går fram av årsrapporten som no er offentleg. Selskapet har generalforsamling torsdag 11. juni.
Auka inntektene
Ifølgje årsrekneskapen auka inntektene med 7,4 prosent i fjor, til 7,4 millionar kroner. Driftskostnadene steig med tre prosent. Selskapet fekk eit underskot på 124.000 kroner før skatt. Det inneber ei betring frå 2018 da tapet var på 416.000 kroner. I løpet av dei to siste driftsåra har såleis avisa fått eit samla underskot på vel 540.000 kroner.
Dette betyr at eigenkapitalen har krympa. Den utgjer no naer 1,1 millionar kroner, eller i overkant av 30 prosent. Selskapet har ei samla gjeld på 2,5 millionar kroner.
Ikkje fornøgd
Avisa blei etablert i 1986 av tidlegare stortingsrepresentant Arne Kielland som fyrst representerte Ap og sidan SV. Han var redaktør fram til han døydde brått i juli 2003.
I dag er Hilde Eika Nesje dagleg leiar og redaktør av avisa.
– Me er ikkje fornøgd med resultatet som skuldast investeringar og auka utgifter, men kostnadene er under kontroll.
Folk trur det er gratis å lage nettavis, men det er det jo ikkje, seier redaktøren som ikkje legg skjul på at pandemien råkar lokale medium hardt.
Glad for nettsatsing
– Trafikken på nett?
– Me har bra besøk. Under koronoakrisa var det knallbra trafikk, så eg er glad for at me har etablert nettavis.
– Kva med Kanalen som Bø blad eig?
– Den går greitt, med eit lite overskot, avsluttar redaktør og dagleg leiar Hilde Eika Nesje i Bø blad.
Rekneskapsførar Jan Lepperød og hans familie er største aksjonaer i Bø blad. Aksjeposten på 27,7 prosent er kontrollert gjennom Lepperød Invest AS.
Glenn Isaksen, dagleg leiar på Vinmonopolet og ein profilert Ap-politikar i regionen, har vel 15 prosent. Tidlegare Bø kommune står oppført ned 12, 1 prosent medan Sparebanken Din eig 9,7 prosent av aksjane. Eivind Eckbo er styreleiar i avisa.