Håpar på ny sykkelveg
Ny gang- og sykkelveg frå Gvarv til Mannebru kan bli ein realitet. Prislappen er kalkulert til 116 millionar kroner. - Eit svaert viktig prosjekt, seier ordføraren.
Halvor Ulvenes
▶ GVARV
Saka er aktuell i samband med revidert nasjonalbudsjett som skal handsamast i Stortinget fredag 19. juni.
Svaert viktig
Ordførar i Midt-Telemark kommune, Siri Blichfeldt Dyrland (Sp), seier til Varden at det er svaert viktig med slik g/s-veg for å knyte saman Bø og Gvarv i den nye kommunen.
Dyrland opplyser at ho har sendt epost både til Telemarksbenken og fylket om traseen. Ordføraren opplyser vidare at reguleringsplanen er vedteken i kommunestyret.
— Ny gang og sykkelveg er viktig både ut frå trafikktryggleik og eit folkehelseperspektiv, seier ordførar Siri Blichfeldt Dyrland.
Stor trafikk
Statens vegvesen har teljingar også denne denne strekninga. Ved Mannebru var årsdøgntrafikken i 2018 på 6.102 bilar, vel ti prosent av desse var tunge køyretøy.
Det var størst trafikk i feriemånaden juli med 7.131 køyretøy. Lågast tal var det i desember med 5.170 passeringar, går det fram av denne teljinga.
Har trua
Framstegspartiet si stortingsgruppe spelar gang- og sykkelvegen inn som eit krav i tingingane med regjeringa og det reviderte budsjettet.
— Eg har god tru på at dette kan bli vedteke. Strekninga er på rundt fire kilometer. Eit overslag syner at det kan koste i området 116 millionar kroner. Dette beløpet kan endre seg. I denne saka har det vore god dialog med både vår representant i Bø, Bjørn Magne Langkås, og ordførar Siri Blichfeldt Dyrland. Båe to har vore aktive, seier stortingsrepresentant Bård Hoksrud til Varden.
Han viser til at det er gangog sykkelveg frå Mannebru til Bø sentrum, på omtrent halve strekningen, og at det er viktig for den nye kommunen å få sykkelveg på heile traseen mellom Bø og Gvarv.
Etter det Varden får opplyst, er det venta at innstillinga til revidert budsjett kjem nokre dagar før handsaminga skjer i Stortinget om vel to veker. Da får ein svaret på om vegprosjektet i midtfylket blir realisert.