Hyttekommunen auka overskotet
Vinje kommune auka overskotet med over 65 prosent i fjor. Netto driftsresultat steig frå 7,6 til 12,6 millionar kroner.
Halvor Ulvenes
▶ VINJE
— Framgangen skuldast auka sals- og leigeinntekter, større statlege overføringar og vekst i både direkte og indirekte skattar, går det fram av årsmeldinga som kjem til handsaming i kommunestyret torsdag.
Der heiter det at resultatet bør vere 1,75 prosent i forhold til inntektene. I fjor var dette talet 2,3 prosent.
Gode tenester
Ifølgje årsmeldinga har kommunen hatt ei god drift med stabile kostnader. I sine kommentarar peikar rådmannen på at kommunen leverer gode tenester til innbyggarane.
— Kommunen er vital og framoverlent. Den blir med i prosjekt av regional, nasjonal og internasjonal verdi, kommenterer rådmann Jan Myrekrok.
Store investeringar
Vinje kommune investerte 130,6 millionar kroner i fjor, mot 99 millionar året før. Kommunen bladde opp 26,9 millionar til kjøp og ombygging av Coopbygget til politihus. Det blei satsa 19,7 millionar kroner på Åmot barnehage medan rehabiliteringa av Edland skule kosta 16 millionar. Kommunen bruka naer 13 millionar på Vinjesenteret og over elleve millionar kroner på gang- og sykkelvegar.
Høg gjeld
Lånegjelda i kommunen er 148.437 kroner per innbyggjarar. For samanliknbare kommunar er talet naer 104.000 kroner medan naboane Tokke og Tinn har ei gjeld på området 60.000 — 62.000 kroner per innbyggjar, ifølgje årsrapporten for 2019.
Folketalet har halde seg stabilt dei ti siste åra, med ein vekst på 0,4 prosent. Vinje har i underkant av 3.700 innbyggjarar.
Trugsmål
Ordførar Jon Rikard Kleven (Sp) kommenterer også situasjonen. Han viser til kraftskatteutvalet som la fram innstillinga si i fjor.
— Utvalet vil fjerne konsesjonskraft, fjerne konsesjonsavgifter og redusere grunnlaget for eigedomsskatt på vasskraftanlegg. Vinje kommune ville tapt 96 millionar kroner. Ei slik endring ville vore slutten på Vinje kommune slik me kjenner den i dag, skriv ordføraren i årsmeldinga.
På hylla
Ordføraren konstaterer at det ser ut til at Stortinget ikkje vil ha ei slik ordning.
— Eg vonar at rapporten støvar ned. Er me heldige, blir den spist av mus også, skriv ordførar Jon Rikard Kleven.