Hans redda dollargliset til kongefamilien
Saman med gode sambygdingar i Vrådal redda Hans Kråkenes i aprildagane 1940 den flotte Buicken til kronprinsparet. Etter krigen blei telemarkingen heidra av Kongen.
Saman med gode sambygdingar i Vrådal redda Hans Kråkenes i aprildagane 1940 den flotte Buicken til kronprinsparet. Etter krigen blei telemarkingen heidra av Kongen.
Kronprins Olav og kronprinsesse Mãrtha fekk bilen, ein flunkande ny Buick Roadmaster Serie 80 C da dei vitja fabrikken i Flint på sin rundtur i USA i 1939. Den kom til Oslo med Stavangerfjord om hausten dette året. Roadmasteren, no med kjenneteikn A-1, er kanskje den mest kjende av bilane til Slottet i Oslo.
Dette er vogna som brakte kong Haakon, kronprinsesse Märtha og barna frå Honnørbrygga til Slottet 7. juni 1945. Den vart òg nytta da kronprins Haakon blei myndig i 1991 og ved signinga av kong Harald og dronning Sonja frå Stiftsgården til Nidarosdomen i Trondheim på St. Hanseftan same året. Den blei sist bruka av kongeparet vårt i samband med den spesielle 17. mai-feiringa no i 2020.
Litt av eit trofe
- Utan redningsaksjonen til vrådølene ville Vidkun Quisling eller Josef Terboven køyrt rundt med dette dollargliset. Den amerikanske bilen ville vore eit skikkeleg trofe for nazistane, seier John Straume i Kviteseid. Den mangeårige Varden-journalisten har i lengre tid samla stoff om redningsaksjonen. Nyleg publiserte han ein artikkel om saka i turistavisa Fram-posten som blir gjeve ut i Vrådal.
Skulekameratar
I dei dramatiske aprildagane i 1940 kom kommandørkaptein Einar Keim køyrande til Vrådal med bilen.
- Det er usikkert om det var 9. eller 10. april om kvelden at han kom hit til Straand Hotell. Der kjem han i kontakt med far min, Sigmund Straand.