Ja til meir detaljhandel i Bø
Kommunestyret sa måndag kveld samrøystes ja til meir detaljhandel utanfor dagens sentrumsgrense i Bø. Dette skjedde etter framlegg frå Arvid Hagen (Ap)
▶ MIDT-TELEMARK
Biltema fekk samrøystes dispensasjon frå kommunale planar, og dermed ja til utvide i Bø Handelspark på Grivijordet. Den ligg utanfor dagens sentrumsgrense.
Lenge såg det ut til at kommunestyret i Midt-Telemark ville seie nei til ein dispensasjonssøknad om meir detaljhandel i parken. Dette blei grunngjeve med at ein må sjå samanheng med behandling av arealplanen neste år.
Nyttar ikkje
Arvid Hagen (Ap) tala varmt for å gje dispensasjon frå dei kommunale planane. Han klarte å snu kommunestyret.
– Me kan ikkje seie nei til 8090 arbeidsplassar, sa Hagen.
Hagen kom seinare i ordskiftet med framlegg om berre å gje Biltema dispensasjon i denne omgang, og så vurdere heile handelsparken i samband med rullering av arealdelen av kommuneplanen. Kommunestyret slutta seg samrøystes til dette.
Ifølgje vedtaket skal kommunedirektøren gå i dialog med Fylkesmannen om vedtaket.
Store sjansar
Framlegget til Hagen kom etter at fleire åtvara mot å seie nei til Biltema.
– Arbeidarpartiet er samla. Kommunestyret tek store sjansar, berre ettertida vil vise kor store. Viss kommunen er veldig treig så sit andre med tomter. Dette er ikkje noko trugsmål. Viss den nye kommuneplanen er rett rundt hjørnet, er det ikkje så mykje å tape, sa Hans Sundsvalen (Ap).
– Bø har tidlegare vore ein jakommune. Handel skaper handel. Store arealkrevjande butikkar flyttar vekk frå sentrum. Utviding vil skape vekst og energi i lokalsamfunnet. Krava ved utviding av sentrumsgrensa er strenge. Butikken må vere på minst 1.500 kvadratmeter. Det skal ikkje vere kafe. Det treng me ikkje der nede. Daglegvare får heller ikkje kome der, sa Bjørn Magne Langkås (Frp).
Ingemar Bråten (H) viste til analysen som seier at ved å seie nei til meir handel i parken kan Bø bli svekka som handelssenter.
Mest skuffa
– Me må ri den dagen me salar. Dette er den mest skuffande saka eg har vore med på i politikken, sa Bråten, før Arvid Hagen kom med framlegget som blei vedteke.
Kommunalsjef Vidar Lofthus åtvara også i innlegget sitt at med bom mellom Bø og Seljord kan fort kundar reise til Notodden dersom det ikkje blir utviding av Bø Handelspark.