Her blir det nye arbeidsplassar
Ein heilt ny aktør etablerer seg i bygda.
*
Hjartdal og Gransherad Sparebank skal om kort tid etablere ny avdeling i Bø.
– Ingen kommentar, seier banksjef Åse Kjersti Øverdal da Varden kontakta finansinstitusjonen om etableringa fredag føremiddag.
Opplysningar Varden har frå anna hald seier at etableringa vil skje om kort tid. Banken skal inn i den nybygde Stasjonsgården 33 som ligg i Stasjonsvegen, berre eit steinkast frå jernbanestasjonen. Bygget har 18 leilegheiter og kontor under.
Kor mange?
Det er usikkert kor mange arbeidsplassar etableringa vil føre med seg, men i bransjen trur ein at det kan dreie seg om kring tre tilsette. Svaret på dette kjem seinare.
Banken vil nok også seinare opplyse om bakgrunnen for etableringa. Den kan ha samanheng med at Sparebanken DIN og Drangedal Sparebank frå måndag går ut av Eikaalliansen. Hjartdal Sparebank er framleis ein del av Eikaalliansen. Sparebanken Din har kring 3.000 forsikringskundar som er i Eika. Den nye aktøren i Bø kan dermed prøve å plukke ein del av desse som både nye bank- og forsikringskundar.
Mange kundar
Hjartdal og Gransherad sparebank har kontor i Sauland, Kongsberg og Notodden, før etableringa i Bø. Ifølgje årsrapporten for 2020 hadde banken 24 tilsette og ein forvaltingskapital ved inngangen til dette året på kring fire milliardar kroner.
Resultatet før skatt var i fjor 35,6 millionar, og etter skatt i underkant av 30 millionar kroner. Ifølgje årsrapporten har banken 9.880 privatkundar.
Fire bankar
Bø har per i dag tre bankar, Sparebanken DIN, Sparebank1 og Sparebanken Sør. Tidlegare var også DNB etablert i bygda. Med Hjartdalbanken som ny aktør blir det igjen fire bankar i bygda.
Adm. banksjef Ben Roger Elvenes i Sparebanken DIN er vel kjend med etableringa til Hjartdal og Gransherad Sparebank.
– Me har tidlegare hatt fire banker i Bø, så noko stor endring blir dette ikkje for oss. Me trur nok den største konkurransen i tida framover kjem frå digitale bankar, men her vil me til å skilje oss ut med vår lokalisering og at me er tilgjengelege, seier adm.banksjef Ben Roger Elvenes.