Det er nok hytter i Rauland no!
Framlegg til ny kommunedelplan (KDP) for Rukkemo - Torvetjønn ligg føre. Det blir lagt opp til 600 nye hytter, i tillegg til dei 750 som er godkjende frå før!
Saka skal opp i Plan- og miljøutvalet 8.12.21, før den skal ut på høyring. No må politikarane taka ansvar for at Rauland skal få vera den flotte bygda den har vore, og ikkje pøse på med fleire hytter og uhandterlege mengder folk!
I forkant av reiselivsdagen for kommunestyret 10. mars 21 skreiv 536 personar seg på underskriftslista «Nok hytter på Rauland no!» på Facebook. Ca 300 var lokale, resten var utflytta raulendingar eller hyttefolk. Lista kom i stand seks dagar før reiselivsdagen, og mange sa i etterkant at dei ikkje rakk å få det med seg, eller at dei ikkje var på Facebook.
På reiselivsdagen skulle det ikkje gjerast vedtak. Den eine politikaren etter den andre frå mange parti sa frå talarstolen at «no er det på tide å setje ein fot i bakken når det gjeld hyttebygging».
17. juni la kommunestyret dei 600 tomtene på is inntil ny KDP ligg føre. Det er altså no!
Hyttetomter som er ferdig regulerte og godkjende kan ikkje trekkjast tilbake utan at kommunen kan koma i erstatningsansvar til grunneigar/utbyggjar (ca 750 tomter i planområdet).
Hyttetomter som ikkje er ferdig regulerte og godkjende innanfor planområdet, kan politikarane stoppe, altså dei 600 tomtene «Framlegg til kommunedelplan Rukkemo – Torvetjønn – 1. gongs handsaming alternativ 3» legg opp til.
Planen tek ikkje omsyn til alle problema enda 600 nye hytter skaper i Rauland, utanom planområdet.
Det tek fleire år frå tomtene blir vedtekne, til konsekvensane viser seg. Me ser no store konsekvensar av alle hyttene som er bygd, i store området utanom hyttefelta. Problemet er nemleg at så store mengder hytter genererer ein irreversibel masseturisme. Framlegget til ny KDP tek ingen omsyn til, og har ikkje konsekvensutgreidd, påverknaden på områda rundt planområdet.
1350 nye hytter (ferdig godkjende og eventuelt 600 nye) fører til fleire tusen fleire fotturistar i villreinområda på Brattefjell/Vindeggen og Hardangervidda, elgjaktterenget til fleire jaktlag frå Kromvikvegen til Møsvasstangen og ned mot Øyfjell, sauebeitet til bøndene i Fundli, Nesland, Haddland og Rauland og skiløyper og turområde som er fulle av folk no, vil få ytterlegare trengsel.
Villreinen er på veg inn på raudlista, og er som kjend svaert var for forstyrringar. Noreg har forplikta seg internasjonalt på å taka vare på arten. Trass i tiltak som utmarksoppsyn og radiobjøller er det mista mange sauer og lam på beite også i år, og fått dyr skambitne av hundar.
Sentrum er ikkje rigga for så stor trafikk som det er i dag, og infrastrukturen heng etter mange stader. Det ligg an til store kommunale utgifter framover i utbygging av parkeringsplassar, g/s-vegar, toalett, stiar med mykje meir. I tillegg vil eit helsevesen som alt er pressa dra på seg store kostnader med å serve hyttefolket i framtida.
Dei positive verknadene for handelstanden vil ikkje gå tilbake, hyttene som alt er her vil framleis stå. Det vil heller ikkje bli ein brå slutt på hyttebygginga all den tid 750 tomter er ferdig godkjende i planområdet, i tillegg til 250 elles i Rauland. Vedlikehald av hyttene som er her vil halde lokale handverkarar med arbeid etter at hyttebygginga tek slutt.
Det er altså fullt mogeleg, og tungtvegande grunnar for, at de politikarar kan seia nei til dei 600 tomtene det er lagt opp til i framlegget til ny kommunedelplan for Rukkemo – Torvetjønn. Så blir det spanande å sjå om det er kortvarig gevinst for nokre grunneigarar og utbyggjarar, eller framtida for Rauland som levande bygd som veg tyngst.