Klar for ny jobb: – Har vore eit vanskeleg val
Kjersti Versto Roheim har vore alvorleg sjuk, men nå er ho klar for ny jobb.
– Det blir rart å rydde pulten og kontoret.
Kjersti Versto Roheim, rektor på Sagavoll folkehøgskole gjennom 12 år, skal snart ta fatt på nye oppgåver.
– Eg har søkt om permisjon for å bli styreleiar for NKF (Noregs kristelege folkehøgskolelag). Eg blei spurt om å stille til val. Det kom litt brått på fordi forgjengaren min har blitt ordførar.
Ho har hatt fleire tillitsverv tidlegare, men dette vervet er for stort til at ho kan ha det ved sidan av jobben som rektor.
– Det har vore eit vanskeleg val. Det er mykje spennande som skal skje på Sagavoll framover.
– De har hatt faerre elevar det siste året, og har redusert i linjer og antall laerarar. Medverkar det til at du vil dra frå skulen?
– Nei, eg er optimist. Me svarar så godt på det ungdom i dag spør etter. Eg trur me berre er nede i ein dupp før det tar seg opp att, smiler ho.
Alvorleg sjuk
Skulen på vollen på Gvarv er blitt 130 år, og det skal byggast nytt internat.
– Me er i gang med reguleringsplanarbeid. Internatet skal stå ferdig i 2026.
– Kvifor vil du dra frå skulen akkurat nå?
– Det var nå eg blei spurt. Det er ei stor tillit, og eg er audmjuk for rolla. Det er spennande å blant anna få jobbe med ny lov og forskrift for folkehøgskulen. Eg likar teamarbeid og det å nå mål saman med andre.
Kjersti har opplevd mykje dei 12 åra ho har vore sjef på Sagavoll. Noko av det tøffaste har ho opplevd på privaten.
– Eg trudde eg var heilt frisk til eg plutseleg ein dag var alvorleg sjuk. På mammografi oppdaga dei tre svulstar i det eine brystet mitt. Då gjekk det fort.
Ho blei operert, gjekk på cellegift og fekk stråling. Ho kan ikkje få fullrost helsevesenet og Brystdiagnostisk senter i Porsgrunn nok.
– Det var så effektivt at det nesten gjekk for fort for meg, seier ho og smiler.
I mai i fjor var ho ferdig med stråling.
Gradvis tilbake
– Eg har berre gode erfaringar med pakkeforløp kreft.
Ho ville tilbake til rektorjobben så fort ho kunne.
– Det å kome i jobb er ein stor del av det å bli frisk. Det har vore krevjande, men eg vil takke Sagavoll og leiargruppa for at eg fekk ta det gradvis.
Førebyggande medisinar gjev ho biverknader ho gjerne skulle vore utan. Men ho er ikkje redd for å få tilbakefall.
– Ein må fokusere på det som er friskt. Om eg skulle seie noko som kunne vore betre så er det at det kunne vore eit organisert samtaletilbod etter pakkeforløpet. Ein treng veiledning og støtte når ein skal tilbake til sitt vanlege liv.
Ho synest det er leit at rehabiliteringssenteret på Nordagutu blei lagt ned. «Pusterommet», eit treningssenter der kreftpasientar kan trene i samband med kreftbehandling, gav ho god hjelp i startfasa etter kreftbehandlinga.
Nye utfordringar
– Eg hadde ikkje klart å køyre til Notodden då eg var sjuk. Det er eit stort tap for Midt-Telemark at det blir flytta.
Nå er ho klar for ny jobb og nye utfordringar. Ho skal kombinere heimekontor med pendling til Oslo og besøk til andre folkehøgskular.
– For Sagavoll sin del trur eg det er positivt med ny leiar nå. Men eg var veldig i tvil om eg skulle takke ja til ny jobb. Eg kjem til å sakne det flotte personalet her og naerleiken og energien til elevane.
Ho fortel om flotte elevstevner og tidlegare elevar som framsnakkar Sagavoll.
– «Der oppdaga eg songen», «Der fann eg friluftslivet», «Der fekk eg kjempegode vener» er utsegn som går att.
Kjersti har stor tru på folkehøgskulen si framtid. Men ho er uroleg for noko som kan påverke meir enn folkehøgskulen i distriktet.
– Eg er bekymra for
Sørlandsbanen.
Eg er så glad i toget, og ei pulverisering av jernbanen fører til mange ulemper. Eg håper folk skjønar kor viktig det er å kjempe for den.