Pro-BBL group sa mga pulitikong kontra: Boto n’yo sa 2016, mababawasan
Nagbabala ang isang grupo ng kabataan, na nangangampanya para sa Bangsamoro Basic Law (BBL), sa mga pulitikong kumokontra sa kontrobersiyal na panukala na kapag patuloy silang nagmatigas ay tiyak na mababawasan ang mga boboto sa kanila sa Mindanao sa 2016.
Ito ang naging babala ng Coalition of Moro Youth Movement (CMYM), na nakabase sa Marawi City, matapos nilang isumite kay Pangulong Benigno S. Aquino III at sa pamunuan ng Senado at Kamara ang mahigit 500,000 lagda na kinalap nila pabor sa pagpapasa sa BBL.
“We are giving these signatures to our political leaders to remind them that at least 500,000 of their constituents support the BBL. They should think twice before using the Bangsamoro for their political agenda because they could lose the support of half a million people,” sabi ni Marjanie Macasalong, chairperson ng CMYM.
Marso 2015 nang ilunsad ng CMYM ang signature campaign nito matapos na maging kuwestiyonable ang kahihinatnan ng BBL kasunod ng madugong engkuwentro ng mga pulis sa Moro National Liberation Front (MILF) at Bangsamoro Islamic Freedom Fighters (BIFF) sa Mamasapano, Maguindanao noong Enero 25, 2015.
Matatandaang mahigit 300 operatiba ng Philippine National Police-Special Action Force (PNP-SAF) ang sumalakay sa pinagtataguan ng teroristang Malaysian na si Zulkifli bin Hir, alyas Marwan, na nagresulta sa pagkakapaslang sa 44 sa mga ito.
Kasunod nito, nagalit ang publiko at marami ang nanawagan na kanselahin na ng gobyerno ang usapang pangkapayapaan nito sa MILF, ngunit nanindigan si Pangulong Aquino.
“The people of Mindanao are tired of war. They will vote for politicians who are for peace. If we are able to gather 500,000 signatures in three months without financial support from anyone, can you imagine how many people are actually supportive of the peace process,” ani Macasalong.