CEU, target maipagtatanggol ang korona
Nakatakdang simulan ng nagdidepensang kampeon na Centro Escolar University ang kanilang five- peat bid sa seniors basketball sa kanilang pakikipagsagupa sa season host na Philippine Women’s University sa pagbubukas ng ika- 46 na taon ng Women’s National Collegiate Athletic Association ( WNCAA) sa Rizal Memorial Coliseum sa Biyernes, Agosto 21.
Ayon kay WNCAA executive council vice president Juanita Alamillo na sa naganap na press conference ng liga sa Conrado Benitez Hall ng PWU sa Taft Avenue, Manila, sisikapin ng kanilang koponan na mapanatili sa kanilang mga kamay ang hawak na korona hindi lamang sa seniors basketball kundi maging sa futsal at cheerleading.
Ngunit malaking banta naman para sa kanila ang reigning overall champion na Rizal Technological University na siyang losing finalist noong isang taon at hangad na makabawi ngayong taon upang madagdag sa kanilang koleksiyon ng titulo ang seniors basketball bukod pa sa tangkang pagtatanggol ng korona sa volleyball, badminton, table tennis at taekwondo.
“Pipilitin po naming bumawi sa seniors basketball at gagawin namin alaht ng makakaya naming para ma- retain yung iba pa naming titles lalo sa volleyball,” ani RTU representative at women’s volleyball assistant coach Carlo Caesar Sebastian.
May 16 na mga koponan, kabilang na ang CEU at RTU, ang maglalaban- laban para sa 10 events na kinabibilangan din ng softball, tennis at swimming.
Ayon kay WNCAA Executive Council Executive Director Maria Vivian Manila, magkakaroon sila sa taong ito ng karagdagang event sa taekwondo, ang poomsae bilang isang demonstration sport.
Nangako naman ang Athletic Directress ng PWU na si dating La Salle football star Mariel Benitez na sisikapin ng kanilang mga atleta na makapag- deliver sa taong ito at makapagpakita ng impresibong performance bilang host lalo na sa larong futsal na malapit sa kanyang puso.
Mas competitive din, aniya, ang kanilang women’s basketball at volleyball ngayong taon habang magtatangka ang kanilang table tennis team na umangat pa mula sa third place finish nito noong nakaraang taon.
Samantala, magbubukas ganap na alas- 10 ng umaga ang 46th season ng WNCAA ngayong Biyernes sa Rizal Memorial Coliseum na tatampukan ng isang makulay na palabas na pinaghandaan ng mga mag- aaral ng PWU na sasagisag sa itinuturong “values” ng liga sampu ng team o slogan sa taong ito na “Strong Women, Strong Nation”