Kumpetisyon sa 28th MILO Little Olympics, magiging dikdikan

Umaasa ang namamahala sa prestihiyosong Milo Little Olympics na magiging mahigpit at matindi ang kumpetisyon sa pagitan ng mga batang kalahok sa pagsambulat ngayong taon ng ika-28 nitong edisyon na tampok ang apat na qualifying leg at ang pagsasagawa ng national finals sa international standard na Laguna Sports Complex.

“We expect a higher level of competition especially that most of the regions are sending a mix of developmental and experienced young athletes. We foresee an even higher quality tournament as almost all schools are sending their best athletes,” sabi ni Milo Sports Executive Robbie De Vera.

Idinagdag ni De Vera, na inilunsad ang ika-28 edisyon ng Milo Little Olympics kasama sina Andrew Neri, NCR Regional Director Dr. Robert Calo, Laguna Governor’s Office Chief of Staff Vincent Soriano at Executive Assistant Von Cruz ang pagsasali sa arnis at karatedo bilang mga demonstration sports.

“It would be our honor if some of our athletes could break junior records because that is what we are actually aiming for,” sabi naman ni Neri. “We want to give them as many tournaments as possible where our young athletes will get to international level,” dagdag pa ni De Vera.

Isasagawa naman ang una sa apat na qualifying legs ngayong Agosto 21 hanggang 23 sa Cagayan De Oro ng kinikilala at pinakamatagal na ginaganap na inter-school youth sports competition.

Hinati naman sa bagong kategorya ang mga lugar kung saan paglalabanan ang mga silya sa North Luzon, South Luzon, Visayas at ang Mindanao. Ang dalawang regional leg ay isasagawa sa bagong host na lungsod sa Visayas Iloilo at ang NCR-South Luzon na lalaruin sa bagong bihis na Laguna Sports Complex.

Matapos ang Cagayan De Oro leg ay tutungo ang eliminasyon sa South Luzon sa Laguna Sports Complex simula Agosto 28 hanggang 30 bago magtungo sa North Luzon sa Setyembre 4 hanggang 6 sa Baguio City. Ang Visayas leg ay sa Setyembre 11 hanggang 13 sa Iloilo.

Lahat ng magwawagi sa apat na elimination leg ay irerepresenta ang kanilang rehiyon sa 2015 Milo Little Olympics National Finals sa Laguna Sports Complex sa Oktubre 23 hanggang 25.

Maliban sa arnis at karatedo, paglalabanan ang kabuuang 15 sports na kinabibilangan ng athletics, badminton, basketball, chess, football, gymnastics, lawn tennis, swimming, table tennis, taekwondo, volleyball, sepak takraw at scrabble.