PNP, tatanggap na ng mga undergraduate
Inihayag ni Philippine National Police (PNP) chief Director General Ricardo Marquez na mabubuksan na ang pintuan at mabibigyan na ng pagkakataon ang mga gustong magpulis subalit hindi nakatapos ng kolehiyo.
Kinumpirma ito ni Marquez sa media conference sa Camp Olivas, San Fernando, Pampanga, at inamin na nahihirapan ang mga aplikante sa mga requirement na hinihingi ng National Police Commission (Napolcom) kaya nahihirapan din ang PNP na maabot ang bilang ng mga pulis na dapat ay isa sa kada 500 katao o 12,000 bagong pulis sa bawat taon.
“Nahihirapan po tayo ma-meet ito kasi kokonti na ang nag-a-apply ng pulis dahil sa mabigat ang mga requirement at kokonti din ang nakatatapos ng kolehiyo dahil sa hirap ng buhay. ‘Yung ibang nakatapos naman ay sa business process outsourcing (BPO),” ayon kay Marquez at idinagdag na binubuksan ng PNP ang konsepto na babaan ang educational requirement ng dalawang taon sa kolehiyo o kaya ay may 72 units sa mga aplikante.
Sinabi pa ni Marquez na priority ng PNP ang pagtanggap sa mga undergrad applicant na mula sa mahirap na pamilya subalit interesado na makatapos ng pag-aaral.
“Magsisimula sila bilang mga police patroller at sa oras na sila ay nakatapos ng kanilang pag-aaral sa kolehiyo habang nagseserbisyo, ay magkakaroon sila ng pagkakataong ma-promote at tumaas ang ranggo,” ani Marquez.
Sinabi pa ni Marquez na ang kanilang proposal sa pagtanggap ng mga pulis na hindi pa nakatapos ng kolehiyo ay sinusuportahan at isusulong na maisabatas ni Senator Grace Poe na magbibigay ng oportunidad sa mga nakatapos sa ilalim ng K to 12 program ng gobyerno.
Sa taong ito, ang police regional office ay nagpoproseso ng mahigit 2,000 aplikante subalit 500 kuwalipikado lang ang matatanggap.