ANO’NG PETSA NA?
IT’S KINDA SLOW ● Natitiyak ko na hindi lamang ako at ikaw na mambabasa ng pahayagang ito kundi ang bawat netizen at yaong gumagamit ng telecommunication devices ang nakararanas ng mabagal na Internet connection. Kung maiinitin ang ulo mo na tulad ko, malamang na makapagmura ka talaga, lalo na kung nagmamadali kang maiparating agad ang iyong mensahe o dokumento sa mga kinauukulan. Naging kataga na ang “Ano’ng petsa na?” na iniuukol sa sobrang kabagalan ay lumipas na ang mga araw sa kahihintay at hindi na alam kung anong petsa na. Kaya naman mainam ang napabalitang maaaring kasuhan ang mga telecommunications company (TELCOS) sa bansa dahil sa sobrang kabagalan ng kanilang Internet services. Well, babala lamang ito ng National Telecommunications Commission (NTC) sa TELCOS na maaaring pukpukin ng mga consumer dahil sa maituturing na panloloko sa mga ito. Kailangan talagang pahusayin ng TELCOS ang kanilang serbisyo or else, maaaring katuwangin ng mga consumer ang NTC sa pagsasagawa ng imbestigasyon. Siyempre, ayaw din naman ng TELCOS na maabala bunga ng mga patung-patong na kasong maaaring isampa ng mga consumer laban sa kanila. Sana hindi umabot sa demandahan nang hindi maputol nang lubusan ang mabagal na Internet connection.
***
ONE SIZE, FITS ALL ● Hahangaan mo rin ang ginagawa ng ilang kababaihan upang matakasan ang matatalim na mga mata ng mga jail warden. Sa masidhing pagnanais na makapagpuslit ng ipinagbabawal na droga sa loob ng piitan ng Pasay City Jail (PCJ), isang babae ang nakumpiskahan kamakailan ng condom na nakasuksok sa kanyang maselang bahagi ng katawan na tatawagin nating “Talaba”. Magdedeliver sana ang naturang babae ng shabu sa kanyang nakahoyong kapitbahay sa PCJ. Alinsunod sa Standard Operating Procedure ng PCJ, isinagawa sa babaeng dalaw ang body search. Siyempre, babaeng warden ang kumapkap sa kanya. Natuklasan sa pagsisiyasat ng lady warden na may nakasuksok na condom sa “talaba” ng babae. At ang laman ng naturang condom ay shabu na nasa plastic sachet, ilang stick ng sigarilyo, dalawang lighter, isang sim card, at ilang pirasong ginipit-gupit na aluminum foil. Ngayon, may kaso na rin ang naturang babae. Haaay....