BINATANG AMA
LUMABAS na ng Valenzuela si Congressman Sherwin Gatchalian. Nagpapakilala na siya sa buong kapuluan sa pamamagitan ng mga bayád na anunsiyo sa media. Sa mga anunsiyong ito ipinaaalam niya ang kanyang prioridad na maluwalhati niyang nagawa sa maikling panahon na siya ay nanungkulan bilang alkalde at mambabatas ng Valenzuela.
Sa kanya ang kayamanan ng bansa ay ang kanyang mamamayan. Kaya siya rito lubusang namuhunan. Gamit ang kapangyarihang ipinakaloob sa kanya ng mamamayan, nagsimula siya sa kanyang nasasakupan.
Sa kanyang panahon, nagsulputan ang mga eskuwelahan. Walang sinuman sa mga taga-Valenzuela ang makapagsasabi na hindi nila napag-aaral ang kanilang anak dahil sa kahirapan. Paano kasi, sa pagnanais ni Gatchalian na makapag-aral ang lahat ng kabataan, inilapit sa kanila ang mga paaralan. Nasa gitna ng mga lugar kung saan naroroon ang maraming residente ang eskuwelahan. Eh karamihan sa mga naninirahan dito ay ang mga nangungupahan at mga manggagawa na nasa kalapit ding lugar ang kanilang pinagtatrabahuhan. Hindi na kailangan mamasahe pa ang gustong mag-aral para marating ang paaralan.
Kaya sa pangkalahatan, mapayapa ang Valenzuela. Noon ay kilala ito sa bansag na “Strike Capital” ng bansa dahil pinutakti ito ng mga welga. Ngayon halos nawala na ang mga ito at napalitan ng mga paaralan. Malaking bagay sa mga magulang ang napapagaral nila ang kanilang mga anak ng halos walang gastos o kung mayroon man, hindi gaanong naaapektuhan ang kanilang gastusin sa pang-arawaraw nilang pangangailangan para mabuhay. Malaking bagay din ito sa pamayanan. Dahil nakapag-aaral ang mga bata, bukod sa alam nila ang makasasama sa kanila, nauubos ang kanilang panahon para sa ikabubuti nila. Sa huli ang mabibiyayaan ay ang lipunang kanilang ginagalawan.
Binata pa si Sherwin, pero para siyang may pamilyado. Mula nang siya ay manungkulan, nagpaaral na siya ng mga bata lalo na iyong mga dukha.