Ateneo at NU, kapwa pumasok sa semi-finals sa Spiker’s Turf

Parehong pumasok sa semifinals ang reigning UAAP champion Ateneo de Manila at dating kampeon na National University (NU) matapos na masungkit nito ang kani-kanilang ikalawang panalo sa quarterfinals ng Spiker’s Turf Season I Collegiate Conference sa San Juan Arena.

Hindi natinag ng 41- puntos na produksiyon ni reigning NCAA champion Howard Mojica ng Emilio Aguinaldo College ang Blue Eagles at pinataob ang Generals,25-21, 20-25, 25-23, 25-23.

Nagposte ng 25 puntos ang UAAP back to back MVP na si Marck Espejo upang giyahan ang Ateneo sa pag-angat sa barahang 5-0 at pormal na pagsalta

sa susunod na round.

Ang kabiguan naman ang ikatlong sunod para Generals na bumagsak sa kartadang 2-3 panalo.

Ginapi naman ng National University ang College of St. Benilde, 22-25, 25-18, 28-26, 28-26 para kasamang pumasok ng Ateneo sa semifinals.

Pinangunahan ni Madzlan Gampong ang naturang panalo ng Bulldogs na nag-angat sa kanila sa barahang 5-0 sa ipinoste nitong 21puntos.

Nanganganib naman ngayong mapasama sa maagang magbabakasyon ang Blazers na pinangunahan ni Johnvic de Guzman na may 18 puntos sa pagbaba nila sa 1-4, panalotalong kartada.

Samantala sa isa pang laro, inungusan ng National College of Business and Arts ang De La Salle University, 25-27, 22-25,25-22, 25-23, 15-9 para tumabla sa ikatlong posisyon sa kanilang biktima.

Nagsalansan ng 19 puntos si John Paul Domingo upang pamunuan ang Wildcats sa pagkopo ng ikalawang panalo na nagtaas sa kanila sa patas na barahang 2-2 kapantay ng Green Spikers na pinangunahan naman ni Reymark Woo na umiskor ng 18 puntos.