Ilagan City, idineklarang ‘Corn Capital of the Philippines’
- Mariin na binati ni Isabela Gov. Faustino G. Dy III ang pamunuan ng City of Ilagan sa pamumuno ni City Mayor Josemarie L Diaz, DMD; Vice Mayor Vedasto D. Villanueva at mga miyembro ng Sangguniang Panlungsod nito matapos pormal silang idineklara ng Department of Agriculture noong Agosto 11, 2015 sa pagdiriwang ng kanilang ikatlong anibersaryo bilang Corn Capital of the Philippines.
Sa bisa ng isang memorandum, inendorso ni Assistant Sec. Edilberto M. De Luna, national corn program coordinator kay Department of Agriculture Proceso J. Alcala kalakip ng Resolution 20 na pirmado ni Ilagan City Mayor Diaz na humihiling na ideklara ang naturang siyudad bilang Corn Capital of The Philippines.
Isinasaad ng naturang resolution na ang Ilagan ay may corn area na 17,568 ektarya at umaabot sa 12,708 ang natataniman at nag- aani ito ng 168.774 metric tons kada taon. Pinagbasehan pa rin ng DA ang pagiging Top 25 Outstanding Cities/Municipalities nila sa National Corn Achievers Award noong 2013 at 2014.
Sinabi naman ni City Mayor Diaz na higit nilang pagbubutihin ang pagtatanim ng mais upang mapunan nila ang supply hindi lamang sa mga karatig na lalawigan at Metro Manila kundi maging sa buong Pilipinas.