5 utas sa buy-bust, anti-criminality campaign
Patay ang tatlong drug suspect sa buy-bust operation at dalawang iba pa sa anticriminality campaign ng Manila Police District (MPD), sa magkahiwalay na lugar sa Maynila, iniulat kahapon.
Sa ulat ni PO3 Michael Maraggun, ng MPD- Crimes Against Persons Investigation Section (CAPIS), unang napatay si Antonio Natividad, ng Labores Street sa Pandacan, dakong 1:00 ng madaling araw kamakalawa.
Nagsagawa ng operasyon laban kay Natividad sa riles sa pagitan ng Barangay 836 at 838, ngunit nanlaban umano ito kaya napatay.
Sa imbestigasyon naman ni SPO4 Glenzor Vallejo, napatay si Marlon de Guzman, tinatayang nasa edad 25-30, at isa pang ‘di pa nakikilalang suspek, 30-35 anyos, nang manlaban sa buy- bust operation sa Quirino Highway sa Malate, dakong 3:25 ng madaling araw kahapon.
Samantala, sa anti-criminality operation ng MPD- Station 5 ay napatay ang dalawang ‘ di pa nakikilalang lalaki na hinihinalang sangkot sa ilegal na droga.
Ayon kay PO3 Dennis Turla, ng MPD-CAPIS, nagpapatrulya ang awtoridad nang mapuna ang dalawa na kahina- hinala ang kilos sa isang eskinita sa Block 15-B, malapit sa seawall sa Baseco Compound sa Port Area, dakong 2:20 ng madaling araw kahapon.
Lalapitan umano ng mga pulis ang mga suspek ngunit biglang kumaripas ang mga ito at nang makorner, bumunot ng baril at nagpaputok ang isa sa mga suspek hanggang sa nauwi sa kanilang pagkamatay.