Noynoy, naalala ang pagkamatay ni Ninoy sa kaso ni Kian

Pinangunahan ni dating Pangulong Benigno “Noynoy” Aquino III ang paggunita sa ika-34 na anibersayo ng pagkamatay ng kanyang amang si dating Senador Benigno “Ninoy” Aquino Jr., sa Manila Memorial Park sa Sucat, Parañaque City kahapon at muling pinasaringan ang war on drugs ng administrasyong Duterte.

Sa harap ng daan-daang nagtipong pamilya, mga kabigan at miyembro ng Liberal Party at tagasuporta, partikular na binatikos ni Noynoy ang pagkamatay ng 17-anyos na senior high school student na si Kian Delos Santos sa kamay ng mga pulis sa Caloocan City.

Ginunita ni Noynoy ang hinagpis ni Lorenza Delos Santos, ina ni Kian, na umuwi para ilibing ang anak, na inihalintulad niya sa pagpatay sa kanyang ama noong Agosto 21, 1983.

“Masakit lang kako kahit 34 years na tapos baka bumalik yung tatay mo, makita kayo, hindi tapos ‘di ba? Parang hindi malinaw eh, parang ‘yon pa rin ba ang pinoproblema natin?” anang Aquino, na ang tinutukoy ay ang walang katapusang isyu ng demokrasya.

“Ano bang makikita ng tatay ko? Binabasa ko po ‘yung storya ni Kian Delos Santos sa mga dyaryo na nakikita ko, sa CCTV doon nakita ang pangyayari. Nabasa ko lang ho ‘yung pahayag ng nanay, isang OFW. Sabi niya, hindi ko alam kung tama talaga ako sa nabasa ko, wala raw dapat magulang na maglilibing sa sarili niyang anak,” dugtong niya.

Inihalintulad ito ni Aquino sa sitwasyon nang barilin ang kanyang ama sa tarmac ng noo’y Manila International Airport at kung paano naghinagpis ang kanyang lola na si Aurora Lampa Aquino, sa pagkamatay ng kanyang anak.

“Noong araw pong iyon siyempre nasa airport siya sasalubungin niya yung anak niya, ganadong-ganado siya makita, matagal tagal niya pong ‘di nakita. Tapos nandoon na po siya sa grounds sa airport kung saan binalita sa kanyang napaslang nga ang aking ama.”

Kaugnay nito, nanawagan ang dating pangulo kay Pangulong Rodrigo Duterte na magsagawa ng malalim at mabilis na imbestigasyon sa pagkamatay ni Delos Santos.

“Ngayon ang importante sa imbestigasyon ay ‘wag naman umabot ng pagkatagal-tagal. ‘Yung matagal na imbestigasyon imbes na nagpapalinaw, eh nagpapalabo,” anang Noynoy.

Si Delos Santos ay binaril at napatay ng mga pulis sa isang antiillegal drug operation sa Caloocan City nitong nakaraang linggo.

Isang misa ang idinaos ni Caloocan bishop Amboo David para sa death anniversary ni Ninoy na dinaluhan ng magkakapatid na Aquino – sina Noynoy, Ballsy, Pinky, Viel at Kris.

Dumalo rin sa misa sa puntod ni Ninoy sina Vice President Leni Robredo, dating LP standard bearer at Department of Interior and Local Government secretary Mar Roxas, Senate minority leader Franklin Drilon, Senador Bam Aquino, Sen. Antonio Trillanes, at dating Manila mayor Alfredo Lim, at iba pa.

Pinasalamatan din ni Noynoy si Duterte sa taos-pusong mensahe nito para sa kanyang ama at pinayuhan itong basahin ang kanyang mensahe at pagnilayan.

Sinabi ni Duterte na si Ninoy “fought for what is right and just” sa kabuuan ng karera nito.

“Even at a time when hope was lost, he remained steadfast in his struggle to restore democracy through non-violent means,” anang Duterte.