Nakaririmarim na, balintuna pa
NANG iminungkahi ni House Majority Floorleader Rodolfo Fariñas ang mga traffic enforcers ng Metro Manila Development Authority (MMDA) na huwag na silang dalhin sa presinto kapag sila ay lumabag sa batastrapiko, naikapit na yata sa kanyang pahayag ang lahat ng hindi kanais-nais na pang-uri o adjective: nakaririmarim, nakapagngingitngit, kasumpa-sumpa, balintuna at iba pa.
Totoong isang malaking kabalintunaan ang naturang pahayag, lalo na kung iisipin na ang mga Kongresista ang bumabalangkas ng mga batas na sa kalaunan ay sila pa ang magiging pasimuno sa paglabag ng mga ito. Marapat na sila pa nga, sila na laging tinataguriang mga kagalang-galang, ang inaasahang magiging modelo o huwaran sa patas na pagpapatupad ng mga batas.
Dahil dito, dapat lamang asahan ang walang katapusang panggagalaiti ng mga motorista na hanggang ngayon ay nakapasan ng kalbaryo bunga ng hindi malutas-lutas na problema sa trapiko. May lohika ang kanilang pagngingitngit sapagkat talaga namang walang sinumang dapat makahigit sa batas. Sabi nga ng mga Kano, nobody is above the law. Mababaw ang lohika ng pahayag ni Fariñas; hindi sila dapat abalahin ng mga traffic enforcers sapagkat ang mga mambabatas ay nagmamadali sa pagtupad ng kanilang makabuluhang tungkulin sa Kamara. Pabiro ang reaksiyon ng mga motorista sa naturang argumento: Bakit sila idadamay ng ilang mambabatas sa kanilang pagiging iresponsable at panlalamang. Kaakibat ito ng mga sapantaha na sila ay may...
itinatago sa kanilang mga sasakyan na hindi dapat madungawan ng mga traffic enforcers.
Ang dapat atupagin ng mga Kongresista, sa paggabay ni Fariñas, ay bumalangkas ng mga batas na didisiplina hindi lamang sa mga traffic enforcers kundi lalo na sa mga motorista. Hindi maikakaila na ang mismong MMDA ay pinamumugaran pa ng ilang kapatid natin na ayaw bumitiw sa pangongotong at sa kawalan ng kakayahang mamahala sa trapiko; at marami pa rin sa ating mga kapwa motorista ang hindi nakauunawa ng road courtesy; humaharurot sa pagmamaneho na hindi alintana ang kaligtasan ng kanilang mga pasahero.
Hindi dapat magpasimuno ang ilang mambabatas sa paghikayat sa mga traffic enforcer na lumabag sa mga regulasyon na sila mismo ang bumalangkas. Manguna sila at maging matinong halimbawa ng tinatawag na law abiding citizen. Sabi nga ng ating kaibigang si dating Manila Mayor Alfredo Lim; The law applies to all, otherwise none at all. Tayong lahat ay pantay-pantay sa batas.