Pekeng ‘Intel-info-broker’ nabuhay uli?
MAALAB pa noon ang damdamin ng mga Pilipino sa naganap na EDSA People Power Revolution nang marinig ko ang mga salitang “intel- info- broker” mula sa mga kaibigan kong militar at pulis. Ito ang tawag nila sa mga taong nagbebenta ng mga intelligence information na makatutulong sa pagdakip sa mga taong pinaghahanap ng batas at sa paglutas sa anumang kasong iniimbestigahan.
Parang mga kabuteng nagsulputan ang mga ito sa mga kampo ng apat na sangay ng Armed Forces of the Philippines (AFP) – ang Philippine Army (PA), Philippine Air Force (PAF), Philippine Navy (PN) at ang noo’y Philippine Constabulary (PC) na Philippine National Police (PNP) na ngayon – upang magbenta ng mga impormasyong magagamit para mahuli ang mga pinuno at miyembro ng grupong biglang nagsulputan upang ibagsak ang bagong tatag na Revolutionary Government ni Pangulong Cory Aquino.
Ang mahigpit na bilin sa akin ng mga kaibigan ko noon sa “intelligence community” ay huwag akong papatol sa mga “intel-info-broker” dahil mas malamang umano na ‘di totoo ang impormasyon ng mga ito – anila, ang tunay na impormasyon ay kusang ibinibigay at hindi nabibili…Ngunit ‘ wag ko raw itong ipagkakamali sa mga impormasyong nakukuha sa tulong ng inilaang “reward” ng pamahalaan dahil ito raw ay palaging totoo.
Matagal na rin akong ‘di nakaririnig ng balita hinggil sa mga “intel-infobroker” dahil bihira na kasing mga operatiba ang pumapatol sa kanila sa loob at labas man ng mga kampo. Kaya kamakailan lang ay nagulat ako nang pag-usapan ng mga kaibigan kong beteranong tiktik ang tungkol sa pagsulpot ng isang grupo ng “intel-infobroker” na kinagat naman daw ng ilang opisyal ng ilang departamento – upang gamitin laban sa mga “KRITIKO” ng kasalukuyang administrasyon.
Sobrang mahal umano ng ibinentang impormasyon na agad kinagat ng isang pinuno ng departamento na palaging nahaharap sa kontrobersiya. Binayaran niya ng malaking halaga ang “intel-info”, ngunit napaso nang paalalahanan siya ng isang ahensiya na “peke” ang impormasyon, ayon sa kanilang pagsasaliksik, kaya nanahimik na lamang ang opisyal upang ‘di malagay sa kahihiyan ang kanyang departamento.
Ito ang siste – makaraan lamang ang ilang buwan, lumitaw na naman ang halos kaparehong “intel-info” at sa pagkakataong ito, dalawang HENERAL na aktibo umano sa serbisyo ang kumagat dito. Nagbayad umano ng malaking halaga ang dalawa para sa kumpletong detalye ng impormasyon...
na galing pa raw sa ibang bansa kaya mahal -- at buong pagyayabang na ibinato sa counterpart nila sa Malacañang na agad namang pumatol dito.
Ang unang opisyal na napaso na sa naturang pekeng impormasyon ay ‘di kumikibo kahit na narinig niyang gagamitin ito ng Palasyo upang atakehin ang kanilang “KRITIKO” – resulta, PLAKDA ito sa mukha nila at maging si Pangulong Duterte ay naging tampulan ng katatawanan sa pagbawi niya sa kanyang “kuwento” upang mapagtakpan ang kapalpakan ng kanyang mga tauhan… nang kanyang mga “counter- intel operative” na sa aking palagay ay patuloy na natutulog sa pansitan!
Hindi ko na idinetalye kung anong “kontrobersiya” ito – ang nais ko lamang kasing palitawin ay ang paulit-ulit ko nang isinisigaw sa kolum na ito na: Magtrabaho naman sana ang mga counter-intel operative ng ating pamahalaan upang ‘di napapahiya ang ating Pangulo sa kanyang mga pahayag na binabawi rin kinalaunan.