Inihanda na ang depensa ni Du30
MAY mga miyembro ng Gabinete ni Pangulong Digong ang hindi pinupuno ang mga kailangang impormasyon sa kanilang 2016 Statement of Assets and Liabilities (SALM), ayon sa Philippine Center of Investigative Journalism (PCIJ).
Isa sa mga tinututukan ng PCIJ ay itong mga SALN ng mga opisyal ng gobyerno na ihihahayag nila, lalo na kung ang opisyal ay nasasangkot sa anomalya. Isang matibay na ebidensiya ang SALN kapag ang opisyal ng gobyerno ay may itinatagong yaman o kaya labislabis ang kinikita kaysa idineklara sa SALN. May kaugnayan ito sa mga pangunahing prinsipyo ng Saligang Batas na transparency at accountability.
Ilan sa Cabinet members na may redaction, o initiman ang ilang impormasyon sa SALN, gaya ng binanggit ng PCIJ, ay sina Presidential Communication Secretary Martin Andanar at Department of Justice Secretary Vitaliano Aquirre II.
Karapatan daw ito ng Cabinet members, sabi ng Palasyo. Bawat Pilipino, aniya, ay may karapatan sa privacy na isinasaad ng Data Privacy Act. Kaya pupulungin daw ng Palasyo ang lahat ng ahensiya kung saan isinusumite ang SALN upang talakayin ang magiging patakaran sa pagbabago o pagbabawas ng mga impormasyong hinihingi ng SALN.
“Samantalang itinataguyod namin ang prinsipyong transparency at accountability,” wika ni Presidential Spokesman Ernesto Abella, “iyong mga nagtatrabaho sa gobyerno, tulad ng mga miyembro ng Gabinete, ay may karapatan din sa privacy.”
Nang tanungin ang Palasyo kung bakit iginigiit nito ang isyung privacy gayong ipinag-uutos ng Saligang Batas na magsumite ang mga opisyal ng gobyerno ng kanilang SALN sa publiko, ang paghahayag daw nito ay dapat na naaayon sa batas, ayon kay Assistant Secretary for Legal Affairs Kris Ablan.
Sa pagitan daw ng SALN law at Data Privacy Act, ang dapat mangibabaw ay Data Privacy Act, dahil sakop daw nito ang lahat ng may kinalaman sa paghahayag ng pribadong impormasyon ng mga Pilipino, private citizen man sila o state workers. Kaya, balewala rin daw iyong Freedom of Information na nilagdaan ni Pangulong Digong dahil ito raw ay executive order lamang.
Marami nang opisyal ng gobyerno ang pinarusahan ng Sandiganbayan na maalis sa kanilang mga posisyon dahil hindi nagsumite ng SALN, o kaya naman ay inipit ang mga impormasyong dapat isiwalat dito. Si Chief Justice Corona ng Supreme Court (SC) ay na-impeach dahil hindi niya ini-report sa kanyang SALN ang kanyang deposito sa ibayong dagat.
Isa sa mga reklamo sa impeachment case laban sa kasalukuyang Chief Justice Maria Lournes Sereno ng SC ay dahil hindi niya isinama sa SALN ang malaking kinita niya bilang abogado ng PIATCO.
Kung mangingibabaw ang gustong mangyari ng Palasyo na puwedeng ang miyembro ng Gabinete ng Pangulo ay mamili ng nais lang nilang ihayag sa kanilang SALN, eh, biktima ng hindi makatarungnang pagpapasunod sa batas ang mga nauna nang pinarusahan dahil nagkulang sila sa paghahayag ng impormasyon sa kanilang SALN.
Hindi kaya binibigyan na ng depensa si Pangulong Digong ang kanyang mga anak na alkade at bisealkalde ng Davao, dahil baka hindi maglalaon ay madiskubre nang tama si Sen. Trillanes—na ang mga ito ay may itinatagong yaman na hindi nakadeklara sa kanilang SALN?