Pista ni San Miguel Arkanghel sa Jalajala
SA bagong liturgical calendar ng Simbahan, pinagsama ang paggunita at pagdiriwang sa kapistahan ng tatlong arkanghel na sina San Miguel, San Gabriel at San Rafael na pawang nagkaroon ng mahalagang bahagi sa kasaysayan ng kalipunan ng tao. Si San Miguel, bilang prinsipe at puno ng mabubuting anghel, ay kinikilalang tagapagtanggol ng Bayang Israel at ng Santa Iglesya. Tagapagtanggol sa kasamaan at sa silo ng demonyo. Ang isang larawan ni San Miguel ay makikita sa label ng bote ng isang brand ng alak. May hawak na espada at tinatadyakan ang isang anghel ng demonyong kampon ni Lucifer. Ang nasabing larawan ay iginuhit ng National Artist na si Fernando Amorsolo.
Si San Gabriel naman ay ang anghel na nagpakita kay Zacarias, ang ama ni San Juan Bautista at nagbalita na magkakaroon ng anak ang kanyang asawang si Santa Isabel. Si San Gabriel din ang isinugo ng Diyos upang ibalita kay Maria ang pagkakatawang-tao ng Diyos Anak sa kanyang sinapupunan. Si San Rafael naman ay itinuturing na gamot ng Diyos at pintakasi ng mga maysakit. Ang iba pang arkanghel ay sina Uriel, Jehudiel, at Baraquiel.
Ang paggunita at pagdiriwang sa kapistahan ng tatlong arkanghel ay ginanap kahapon, Setyembre 29. Ang National Shrine ni San Miguel at ng mga Arkanghel ay nasa San Miguel, Maynila na nagdaos ng misa at prusisyon. Sa ibang mga bayan sa iniibig nating Pilipinas ay ginunita at ipinagdiwang din ang kapistahan ni San Miguel partikular na sa Oas, Albay, Orosin, Sorsogon, Gandara, San Sebastian, Basey, Samar, at Iligan City.
Sa Rizal, partikular na sa Jalajala, ay masaya, makulay at makahulugang ginunita at ipinagdiwang ang kapistahan, ika-235 taon, ni San Miguel Arkanghel bilang patron saint. Ayon kay Jalajala Mayor Ely Pillas, ang pagdiriwang ay bahagi ng pasasalamat sa Poong Maykapal at pagpapahalaga sa mga tradisyon at kultura sa patnubay ng kanilang patron saint. Tampok sa kapistahan ang isang concelebrated mass sa simbahan ng parokya ni San Miguel Arkanghel at sinundan ng parada patungo sa Laguna de Bay. Sa bahaging sakop ng lawa ginanap ang masaya at makulay na pagoda o fluvial procession na dinaluhan ng mga mangingisda, magsasaka, mga opisyal ng munisipyo at barangay, mga kabataan at iba pang may panata at debosyon kay San Miguel Arkanghel. Pagsapit ng hapon, tampok naman ang brass band at majorette competition ng tatlong banda ng musiko at ang “Palarong Pinoy”.
Pagkatapos ng prusisyon na nagsimula sa ganap na 4: 00 ng hapon, nagsagawa ng misa ng pasasalamat, bandang 6:00 ng gabi, upang mabigyan ng pagkakataon ang mga taga-Jalajala at ang iba pang deboto ni San Miguel Arkanghel na hindi nakapagsimba at nakapagpasalamat noong umaga. Ito ay sinundan ng variety show sa covered court ng lumang munisipyo at ng pagtatanghal ng mga bading sa Jalajala.
Ang Jalajala ang huling bayan na nasa dakong silangan ng Rizal. Tahimik at pinakamalinis na bayan sa Rizal. Tinawag na “Paraiso ng Rizal” dahil sa pagiging tahimik at malinis na bayan. Sa Jalajala matatagpuan ang pinakamalaking Rice Processing Complex na model project sa bansa ng Comprehensive Agrarian Reform Program (CARP).
Ayon sa kasaysayan, ang Jalajala ay kilala dati sa tawag na “La Villa de Pila” na nasa pamamahala ng mga paring Franciscano. Ang unang simbahang kawayan ay itinayo noong 1678 ni Padre Luis Saro. Pagsapit ng 1820, naging malawak na hacienda na taniman ng kape, mga punongkahoy na namumunga, palayan at babuyan. Naging ganap na bayan nang ihiwalay sa Pililla na dating isang barangay noong 1823. At noong 1853, isinama sa itinatag na Distrito Politica Militar de Morong na dating pangalan ng lalawigan ng Rizal. Ang Jalajala ay naging isang malayang munisipalidad noong Marso 27, 1907.