ASPAC University Games sa Cebu

GAGANAPIN ang 2nd Asia Pacific University Games (APUG) sa Disyembre 6-11 sa University of Cebu (UC) sa Cebu City, ayon sa Federation of School Sports Association of the Philippines (FESSAP).

Ito ang ikalawang pagkakataon na magsisilbing host ang unibersidad sa mga atletang-estudyante na nasa pangangasiwa ng Asia Pacific University Sports union ( APUSU), ngunit sa pagkakataong ito, nadagdagan ng sports ang paglalaban.

“We started with three sports in 2015 and now, we have four. In the future, we can have more sports,” pahayag ni APUSU secretary general, Prof. Mustaza Ahmad.

Hinirang ng APUSU para makatuwang ni Ahmad sa organizing committee si UC College of Law Dean, Atty. Baldomero Estenzo. Si Estenzo ay nagsisilbi ring FESSAP vice president.

Sa nakalipas na edisyon, ang Nippon Sports University of Japan ang kampeon sa basketball, habang ang Universiti Teknologi MARA (UiTM) ng Malaysia ang nagwagio sa badminton.

Ayon kay Mustaza, secretary general din ng Malaysian University Sports Council at director ng UiTM Sports Center, ilang bansa tulad ng Sri Lanka, ChineseTaipei, at Indonesia ang nagnanais na makalahok sa torneo.

“Our target is to have more participants. We want to make this tournament bigger in the future,” pahayag ni Mustaza. Aniya, dalawang unibersidad mula sa Malaysia ang sasabak din sa torneo.

Pinamumunuan ang APUSU ni Filipino philanthropist at sportsman Alvin Tai Lian, chairman din ng FESSAP, ang tanging organization sa Pilipinas na kinikilala ng International University Sports Federation (IUSF) na nakabase sa Lausanne, Switzerland.

Samantala, ipinahayag din ng FESSAP ang pagiging host ng bansa sa 1st Asia Pacific University Swimming Championship sa Abril.

Sinabi ni FESSAP executive vice president, Prof. Robert Milton Calo ng Philippine Inter Schools, Colleges and Universities Athletic Association (PISCUAA), na pinagpipilian ang Iloilo at Pampanga para maging host sa torneo na lalahukan ng Malaysia, Australia, Japan, Chinese Taipei, Papua New Guinea at South Korea.

Ang FESSAP Aquatic Club na pinamumunuan ni Calo ang mangangasiwa sa preparasyon at aspeto sa technical ng kompetisyon.