Ne 2:1-8 ● Slm 137 ● Lc 9:57-62
Samantalang naglalakad sila, may taong nagsabi kay Jesus, “Susunod po ako sa inyo kahit saan.” Sumagot si Jesus, “May lungga ang asong-gubat at may pugad ang ibon, ngunit ang Anak ng Tao’y wala man lamang matulugan o mapagpahingahan.” Sinabi ni Jesus sa isa, “Sumunod ka sa akin.” Ngunit sumagot ang tao, “Panginoon, hayaan po muna ninyo akong umuwi upang ipalibing ang aking ama.” Sinabi ni Jesus sa kanya, “Ipaubayamo na sa mga patay ang paglilibing ng kanilang mga patay. Ngunit ikaw, humayo ka at ipahayag mo ang tungkol sa paghahari ng Diyos.” Sinabi naman ng isa, “Susunod po ako sa inyo, Panginoon, ngunit magpapaalam muna ako sa aking kasambahay.” Sinabi sa kanya ni Jesus, “Ang sinumang nag-aararo at palaging lumilingon ay hindi karapat-dapat sa paghahari ng Diyos.” PAGSASADIWA:
Susunod po ako sa inyo… ngunit… —Sa sinabi ng una at sa naging tugon ni Jesus, inilalarawan ang isang uri ng pagsunod na ang hinahanap ay ang katiwasayan sa buhay at sa kabilang banda naman ay ang hindi tiyak na katayuan ni Jesus sa buhay na ito na salat sa maraming bagay.
Sa ikalawa namang paglalarawan, nais ituro sa atin ni Jesus na hindi masama ang pagtupad sa ating mga pananagutan sa ating mga mahal sa buhay. Ngunit ang ating pananagutan sa Diyos ay nakahihigit sa anumang pananagutan na mayroon tayo sa ating pamilya o sa sinumang tao.
Sa ikatlong tauhan, ipinahayag ni Jesus na wala ring saysay ang pagsunod natin sa kanya kung palagi tayong “lingon ng lingon” at may panghihinayang sa mga bagay na iniwan na natin para sa kanya.
Malamang bumalik lang sa dating pamumuhay kapag ganito ang naging ugali. Hinihingi ng tunay na pagsunod kay Jesus ang matibay at ganap na pagpapasyang tumalikod sa mga bagay na makamundo.