‘DIGONG DIPLOMACY!’
PSC, pursigidong mapanagot ang mga NSA, POC sa ‘unliquidated funds’
HINDI padalos-dalos na diskarte ang inihahanda ng Philippine Sports Commission (PSC), ngunit determinado ang sports agency na papanagutin ang mga National Sports Associations (NSAs) at Philippine Olympic Committee ( POC) sa kanilang mga pananagutan sa ‘ unliquidated financial assistance’.
“Diplomasya po tayo. The NSAs and the POC are not enemies. They are partners in sports development. Kung ano po ang pagkukulang, kakausapin po natin at bibigyan ng sapat na panahon para ma-liquidate nila yung dapat sa PSC,” pahayag ng bagong talagang PSC Executive Director na si Atty. Sannah B. Frivaldo sa isinagawang media conference kahapon sa PSC building.
“Kung talagang hindi na nila ma- trace yung mga documents na kailangan nilang isubmit sa atin, kailangan pa rin nilang magbigay ng proper documents and papers na magpapatunay na talagang hindi na nila ma-trace yung mga resibo whatever evidence na kailangan para ma-proved yung claimed nila. Hindi puwedeng, back to zero lang, kailangan nilang managot dito,” ayon sa San Beda law graduate.
Iginiit naman ni PSC Chairman William ‘Butch’ Ramirez na ibinigay na nila ang sapat na panahon at pagkakataon sa mga NSA at sa POC para ma-clear sa kanilang ‘unliquidated expenses’.
“Kung hindi sila makapag- comply. Bahala na ang Commission on Audit (COA) to file necessary cases against them,” pahayag ni Ramirez
Batay sa huling report ng COA, may kabuuang P100 milyon ang unliquidated expenses ng mga NSAs at POC.
Sinabi rin ni Ramirez na nakatuon ang ahensiya sa pagpapalakas ng grassroots sports programa at inaasahang mas mapapaigting nito ang programa sakaling maging institusyon ang Philippine Sports Institute (PSI).
Pinangunahan ni PBA Partylist Congressman Mark Sambar ang pagpasa ng resolusyon sa Kongreso para maging institusyon ang PSI, habang may kaparehong Senate Bill si Senador Manny Pacquio para maisama sa pagamyenda ng PSC law ang PSI bilang ahensiya na nakatuon sa grassroots sports program.