Umento, benepisyo hirit ng teachers
Humihingi ng umento at dagdag pang mga benepisyo ang mga guro nang magsagawa ng kilos- protesta sa Maynila kahapon ng umaga, kasabay ng pagdiriwang ng World Teachers’ Day, Oktubre 5.
Ang aktibidad, na pinangunahan ng Association of Concerned Teachers-National Capital Region (ACT-NCR), ay isinagawa dakong 7:00 ng umaga sa Mendiola sa Maynila.
Naglatag pa ng mahabang mesa ang mga guro at nagluto ng instant noodles, pritong itlog, at pritong tuyo para sa kanilang almusal, bilang simbolo ng mababang pasahod sa mga guro.
Ayon sa ACT-NCR, pinipilit lamang nilang pagkasyahin ang kanilang maliit na sahod upang mairaos ang pang- araw- araw na pangangailangan ng kanikanilang pamilya.
Kasabay nito, nanawagan din ang grupo na tuldukan na ang privatization at commercialization ng edukasyon sa bansa.
Samantala, positibo naman si Senator Loren Legarda na magkakaroon ng dagdag na benepisyo ang mga public school teacher para sa karagdagang pagaaral, gayundin ang dagdag sa chalk allowance.
Naglaan ng karagdagang P10 milyon ang Senado para sa capital outlay ng State Universities and Colleges ( SUCs), upang pondohan ang mga pagsasanay, seminar, at cholarship program para sa Masters and Doctorate degree ng mga guro.
Ang P2,500 chalk allowance naman ay naging P3,500 na, ayon kay Legarda, chairperson ng Senate committee on finance.