Nadal, target ang No. 1 ranking
SHANGHAI ( AP) – Umusad sa semi-finals si top-ranked Rafael Nadal matapos malusutan ang matikas na sixth-seeded na si John Isner, 6-4, 7-6 (0), nitong Biyernes (Sabado sa Manila), sa China Open.
Tangan ni Nadal, kampeon sa French Open at US Open, ang limang titulo ngayong season kaya tumaas ang posibilidad na makuha niya ang World No.1 ranking sa pagtatapos ng taon.
“I don’t remember a lot of mistakes,” sambit ni Nadal. “I went to the net very often. I did the things that I want to do, and I did it well, so very happy.”
Sa women’s side, naungusan ni unseeded Carolina Garcia ng France si third-seeded Elina Svitolina ng Ukraine, 6-7 (5), 7-5, 7-6 (6), sa mahabang isang oras at kalahating laban para maisaayos ang semi-final duel kay Petra Kvitova.
Haharapin naman ni Simona Halep, posibleng makuha ang No. 1 ranking sa unang pagkakataon, ang French Open champion na si Jelena Ostapenko sa hiwalay sa semi-final match.
Naisalba ni Nadal ang lahat ng tatlong break points para pataubin si Isner. Sunod niyang makakaharap si third-seeded Grigor Dimitrov, na nagwagi kay Roberto Bautista Agut, 7-6 (5), 4-6, 6-2.
Naging kapartner ni Nadal sa ensayo si Dimitrov nang manatili ang Spanish star sa Mallorca kung saan naging malapit silang magkaibigan.
“We catch a few ones (fish), but not very big,” sambit ni Nadal. “But we had some good dinner.”
Umusad din si Nick Kyrgios nang magwagi kay Steve Darcis via retired, 6-0, 3-0.
Makakaharap niya si secondseeded Alexander Zverev, nagwagi kay Andrey Rublev, 6-2, 6-3.
“It’s great for any player to qualify,” sambit ni Zverev, nakapagwagi sa limang torneo ngayong season.
Ginapi ni second-ranked Halep si Daria Kasatkina ng Russia, 6-2, 6-1.
Sakaling makausad sa Finals, papalitan ni Halep si Garbine Muguruza sa No. 1 ranking.
Nagwagi si Kvitova sa kababayang Czech na si Barbora Strycova, 6-3, 6-4.
“We are pretty good friends from the Fed Cups,” pahayag ni Kvitova. “We know each other well. We practice a lot as well. Maybe it’s extra motivation for us to play each other.”
Naungusan naman ni Ostapenko si Sorana Cirstea, 6-4, 6-4.