Mga responsable sa DUI, papanagutin
Muling tiniyak ng Malacañang sa publiko na ipagpapatuloy ng gobyerno ang pagtugis sa mga responsable sa pagpatay na tinatawag ngayong death under investigation (DUI), sa kasagsagan ng all-out war ng administrasyon laban sa illegal drugs.
Ito ay pagkatapos ideklara ng Philippine National Police (PNP) na “cased closed” na ang pagpaslang kay Michael Siaron nang makilala na ang suspek na pumatay sa kanya, na isang Nesty Santiago, sa pamamagitan ng ballistic examination sa baril na nakuha sa crime scene.
Si Siaron ay ‘di sinasadyang naging imahe ng drug war ni Pangulong Duterte nang makuhanan ng isang photojournalist habang yakap ng asawa ang kanyang walang buhay na katawan, na mistulang “Pieta”.
Sinabi ni Presidential Spokesperson Ernesto Abella sa isang pahayag na si Siaron ay pinatay ng miyembro ng sindikato ng droga, sumususog sa kanilang naunang pahayag na ang mga grupong ito ay may kinalaman sa mga pagpatay.
“Authorities have put closure on the death of Michael Siaron after ballistics examination from a recovered firearm revealed that he was killed by a member of a syndicate also involved in the illegal drug trade,” sabi ni Abella kahapon.
“The Siaron case verifies what government has said from the start of the campaign against illegal drugs— many of these killings were perpetrated by those involved in drug operations as well; drug traffickers and pushers eliminating each other,” dagdag niya.
Ayon kay Abella, ang patuloy na pagbibintang sa Philippine National Police (PNP) na sila ang nasa likod ng mga pagpatay ay hindi makatarungan sa mga tumutupad sa kanilang tungkulin nang naaayon sa batas.
“The relentless attribution of such killings to police operations was both premature and unfair to law abiding enforcement officers who risk life and limb to stop the proliferation of illegal drugs in our society,” aniya.
“Government assures the public and the families of victims of deaths under investigation that authorities will pursue cases until the truly guilty are brought before the bar of justice,” dagdag ni Abella.
Si Siaron ay binaril sa EDSATaft area noong Hulyo 23, 2016 ng mga lalaking nakasakay sa motorsiklo. Pagkatapos mabaril, dinaluhan, kinandong at niyakap siya ng kanyang asawa.
Ang naturang litrato ay agad kumalat at naging viral sa social media at ginamit din ng international news agencies. Napansin din ang pagkakahawig nito sa Pieta.
Ang Pieta ay ang pamosong sculpture na nililok ni Michelangelo noong 15th century bilang paglalarawan kay Birhen Maria habang kandong ang walang buhay na katawan ni Jesus.
Dahil sa mga pagpuna sa drug war, lalo na sa puwersa ng pulisya, nagdesisyon si Pangulong Duterte na patigilin ang PNP, ang Armed Forces of the Philippines, at iba pang mga ahensiya ang pagtugis sa drug personalities at ipinasolo ang responsibilidad sa Philippine Drug Enforcement Agency (PDEA).
Nitong Huwebes, inanyayahan ni Pangulong Duterte and European Union (EU) at ang iba pang bansa sa kanluran na magtungo sa bansa upang pamunuan ang anti-drug campaign.
“Maybe you can do it for us. I am inviting you to join the fray. I would be glad to appoint you the lead role in ( solving) the problem,” sabi ni Duterte, bilang tugon sa mga pagpuna ng international community.
“If you cannot stop interfering, at least be educated in your assessment,” dagdag niya. “The problem is serious and we’re trying to solve it.”