Malinaw na mensahe sa mga rebelde ng Marawi
TAPOSna ang bakbakan sa Marawi City. Martes noong nakaraang linggo ay idineklara na ni Pangulong Duterte na malaya na ang siyudad sa terorismo makaraang mapatay ng tropa ng gobyerno ang dalawang pangunahing lider ng Maute-Islamic State (IS) — sina Isnilon Hapilon at Omarkhayam Maute — sa isa sa huling gusaling kinubkob ng mga terorista.
Pagsapit ng Linggo, iisang gusali na lamang ang hawak ng nasa 30 terorista. Nitong Lunes, inihayag ni Defense Secretary Delfin Lorenzana ang pagpapatigil sa lahat ng combat operations sa pagpatay sa mga huling terorista. Natagpuan ng militar ang 42 bangkay sa huling gusali ng mga terorista, ang ilan sa mga ito ay posibleng nagpakamatay.
Si United States Defense Secretary James Mattis, na nasa Pilipinas ngayon para dumalo sa pulong kasama ang mga ASEAN foreign minister, ang unang dayuhang opisyal na pumuri sa sandatahan ng Pilipinas sa pagtatagumpay sa Marawi. Nagpaabot ito ng malinaw na mensahe sa mga terorista, aniya.
Katuwang ang mga mandirigma ng Islamic State mula sa iba’t ibang bansa, tinangka ng mga teroristang Maute na makapagtayo ng sentro ng pandaigdigang IS caliphate sa Timog-Silangang Asya at itinalaga pa si Hapilon bilang “emir” sa rehiyon. Maipaliliwanag kung bakit tumagal ang bakbakan — limang buwan. Nagawang makubkob ng Islamic State ang malalawak na lugar sa Syria at Iraq sa loob ng ilang taon, at inakala marahil ng grupong ito ng mga terorista na magagawa rin nila ito sa Pilipinas.
Nasobrahan marahil sa kumpiyansa ang mga terorista ng Maute-IS batay sa naging pagtaya nito sa populasyon ng mga Muslim sa Marawi City. Inasahan marahil nila ang malawakang suporta ng mga residente sa lungsod, na 99.6 na porsiyento ay mga Muslim. Subalit ayon sa mga saksi, nang magsimula nang magbalikan sa Cagayan de Oro ang mga pagod na pagod na sundalo, sakay sa military truck, naglabasan sa kalye ang mga tao at nagbunyi at nagpasalamat sa kanila.
Dahilan din marahil dito ang inasal ng mismong mga sundalo at ng pamunuan ng Armed Forces of the Philippines. Buong giting silang nakipagbakbakan sa mga terorista, subalit mayroong konsiderasyon sa kaligtasan ng mga bihag, na nalagay sa panganib ang mga buhay. Ginawa ng militar ang lahat ng kanilang makakaya upang hindi naman masyadong mapinsala ang mga mosque. Hindi sila ang sandatahang mapanakop; sila ang puwersang sumaklolo upang labanan ang mga armado na karamihan ay dumayo pa mula sa Indonesia, Malaysia, at Gitnang Silangan.
Ang pagsugpo sa rebelyon sa Marawi ay tunay na nakapagpaabot ng malinaw na mensahe sa Maute at sa mga kasabwat nito sa IS, at hindi lamang ito sa larangan ng pakikipagbakbakan. Hindi handa ang mga Pilipino na tanggapin ang isang Islamic State caliphate na pinamumunuan ng isang lider mula sa Gitnang Silangan. Hindi perpekto ang ating pamahalaan at ang pamumuhay natin bilang mga Pilipino, subalit ito ay sa atin at nasa atin ang lahat ng oportunidad upang hubugin at isakatuparan ang mga ito, sa sarili nating paraan, sa gabay ng ating mga inaasam at hinahangad bilang bansa.