Sabwatang lumikha ng digmaan
NGAYONGnakalaya na sa bagsik ng digmaan ang Marawi City — at pinausad na rin ang pagbangon at rehabilitasyon ng naturang siyudad — kailangang ugatin kaagad ng Duterte administration ang sinasabing pagsasabwatan na lumikha ng madugong trahedya. Naniniwala ako na imposibleng makapasok sa naturang lungsod ang mga terorista kung naging mapagmatyag lamang ang kinauukulang mga awtoridad.
Ang sumiklab na giyera sa Marawi City na ikinamatay ng daan-daang teroristang kaalyado ng Maute Group, at ng daan-daan ding napatay na mga sundalo, pulis at mga sibilyan ay nag-iwan ng mga katanungang nangangailangan ng kagyat na katugunan. Marapat lamang nating mabatid kung hanggang saan ang partisipasyon ng local government units (LGUs), lalo na ang mga opisyal ng barangay sa naganap na giyera. Hindi ba lumutang din ang mga sapantaha na ang mga lider ng oposisyon na pawang kritiko ng kasalukuyang administrasyon ay isinasangkot din sa naganap na digmaan?
Naniniwala ako na sa nabanggit na argumento nakaangkla ang paninindigan ng ilang Senador upang ugatin ang kaliit-liitang detalye na nagbunsod ng malagim na digmaan. Walang kagatul-gatol na ipinahiwatig nina Senador Gregario Honasan at Senador Chiz Escudero na hindi sila titigil hanggang hindi nalalantad ang sinumang nakipagsabwatan sa mga terorista sa paghahasik ng sindak at panganib sa naturang siyudad.
Paano nga namang makapapasok sa Marawi City ang daan-daang Maute Group na bitbit pa ang malalakas na kalibre ng baril kung walang bendisyon, wika nga, ng kanilang mga kasabwat? Naging bulag, bingi at pipi kaya ang LGUs at hindi nila natalasan ang pagkukuta ng mga terorista sa mga gusali sa siyudad? Paano nila naipasok ang malaking kantidad ng pagkain, ammunition at iba pang kagamitan nang walang nakapansin sa kanila? Karaniwan lamang ang ganitong mga katanungan at naulinigan na natin ito bago pa man sumiklab ang digmaan subalit dapat lamang busisiin din ito ng nasabing mga mambabatas.
Dapat ding aksiyunan kaagad ang lantad na partisipasyon ng Islamic State of Iraq and Syria (ISIS) na naging kakawing ng Maute Group sa paglulunsad ng giyera. Marami sa nasabing mga dayuhan ang napatay sa bakbakan sa Marawi City. At hindi malayo na ang ilan sa kanila ay gumagala pa sa ilang lugar sa Mindanao.
Ganito rin ang partisipasyon ng ilang Malaysian. Katunayan, napatay din ang isang terrorist leader ng bansang iyon; tinustusan nito ang kailangang salapi at armas ng Maute Group. Hindi kaya pakay nito na ang Marawi City at ang ilan pang lugar sa Mindanao ay maging bahagi ng Malaysia?
Ang nabanggit na mga bansa, at maaaring mayroon pang iba, na sinasabing nakipagsabwatan sa Maute Group at sa iba pang terorista, ay dapat papanagutin. Kailangan kayang putulin na ang relasyong diplomatiko ng mga ito sa ating bansa?