Broadcaster binistay, patay

Patay ang isang broadcaster habang sugatan naman ang livein partner niya makaraan silang pagbabarilin ng hindi pa nakikilalang suspek sa Bislig City, Surigao del Sur, nitong Martes ng gabi.

Ayon sa ulat ng Bislig City Police Office (BCPO), dakong 9:00 ng gabi nang mangyari ang krimen malapit sa bahay ng mamamahayag.

Ang napatay ay kinilalang si Christopher Lozada, 29, radio anchor sa Prime Broadcasting Network, habang isinugod naman sa ospital ang kinakasama niyang si Honey Faith Tuyco Indog, 19, ng Purok 5, Barangay Coleto, Bislig City.

Sinabi sa report ni Chief Insp. Joseph Jementiza, hepe ng BCPSHomicide Division, na sakay ang mga biktima sa kanilang Toyota Vios pauwi nang tambangan at pagbabarilin ng mga suspek na sakay sa isang van.

Sa ngayon, patuloy ang imbestigasyon sa krimen, bagamat napaulat na may hinala ang pulisya na may kinalaman sa trabaho ni Lozada ang pamamaslang sa kanya.

Kaugnay nito, itinanggi ni Bislig City Mayor Librado Navarro na may kinalaman siya sa pagkamatay ni Lozada, bagamat inamin niyang naghain siya ng tatlong bilang ng libel laban dito noong 2012.

Ang kaso ay kaugnay ng mga pagbatikos ni Lozada sa alkalde sa programa nito sa radyo.

“I can hold my head up high and say I am innocent and my conscience is clear,” sinabi ni Navarro sa isang panayam. “He is like a son to me.”