Vendor itinumba habang tulog
Isang vendor na umano’y dating sangkot sa ilegal na droga at sinasabing may kaalitang drug pusher, ang namatay nang pagbabarilin ng ridingin-tandem habang natutulog sa kanyang kariton sa bangketa sa Port Area, Maynila bago maghatinggabi nitong Martes.
Mga tama ng bala sa noo at kanang pisngi ang ikinasawi ni Sonny Boy Lapore, 48, ng Barangay Bagtas, Tanza, Cavite, at nagtitinda sa sidewalk sa Bonifacio Drive sa Port Area.
Inaalam pa ng mga awtoridad ang pagkakakilanlan ng dalawang suspek na mabilis na tumakas matapos ang krimen.
Batay sa ulat ni PO3 Michael Maraggun, ng Manila Police District-Crimes Against Persons Investigation Section ( MPDCAPIS), nabatid na dakong 11:45 ng gabi nang mangyari ang krimen sa sidewalk kung saan nagtitinda si Lapore, at nagsisilbi rin nitong tirahan habang nasa Maynila.
Nabatid na natutulog ang biktima sa kariton, katabi ang kinakasamang si Emily Gabiola, 48, nang magising ang babae sa malakas na putok ng baril, at nakitang duguan ang biktima habang nasa tabi nito ang isang lalaki na nagsusuksok ng baril sa beywang.
Mabilis na umangkas ang suspek sa motorsiklo, na minamaneho ng isa pang lalaki, tsaka sila humarurot patakas.
Hinala ng mga awtoridad, may kinalaman sa ilegal na droga ang pagpatay matapos na mabatid sa kanilang imbestigasyon na dating gumagamit ng droga si Lapore, at nagsilbi pa umanong runner ng ilang tulak.