Empleyado kinatay ng katrabaho

Labas ang bituka at putol ang tatlong daliri ng 50-anyos na production maintenance ng isang tabloid newspaper matapos siyang abangan at pagsasaksakin ng nakaalitang katrabaho sa loob ng kanilang pinagtatrabahuhan sa Port Area, Maynila, nitong Linggo ng gabi.

Isinugod pa sa Manila Doctor’s Hospital si Arnold Reyes, 50, trabahador ng People’s Journal, at taga-Barangay Santolan, Pasig City, ngunit binawian din ng buhay dahil sa tinamong malalim na saksak sa kanang bahagi ng tiyan.

Nabatid na halos ikaluwa ng bituka ni Reyes ang tinamo niyang saksak sa tiyan, habang naputol din ang tatlong daliri sa kaliwang kamay nito.

Pinaghahanap na ng mga awtoridad ang suspek na si Ronnel Tolibat, alyas “Boy Foundation”, production assistant ng People’s Journal.

Nabatid na dakong 8: 45 ng gabi nang maganap ang krimen sa ikalawang palapag ng People’s Journal building na matatagpuan sa pagitan ng 19th Street at Railroad Street sa Port Area.

Batay sa ulat ni SPO3 Charles John Duran, ng Manila Police District-Crimes Against Persons Investigation Section (MPD-CAPIS), dakong 8:45 ng gabi at magdu-duty si Reyes sa ikalawang palapag ng People’s Journal building sa 19th Street at Railroad Street sa Port Area nang salubungin siya ng saksak ng suspek.

Nabanggit pa ni Reyes sa kanyang mga katrabaho na sinaksak siya ni Boy Foundation, na kaagad na hindi na matagpuan sa establisimyento.

Lumilitaw na posibleng resbak ang motibo sa pagpatay dahil dati na umanong may alitan ang dalawa na nag-ugat nang kumprontahin ni Reyes si Tolibat na lagi umanong nakatingin sa kanya. Nitong Sabado, nagtalo pa ang dalawa na nauwi sa pambabato ng biktima ng bote sa suspek.