Batang Pinoy Visayas sa Dumaguete City

MULING papagitna ang matitikas na batang atleta sa pagsikad ng Philippine Sports Commission-Batang Pinoy Visayas leg simula ngayon sa Lamberto Macias Sports and Cultural Center dito.

Kabuuang 2,500 kalahok mula sa iba’t ibang lalawigan ng rehiyon ang magpapakitang gilas sa torneo na bahagi ng grassroots sports program ng ahensiya.

Magsasagawa ng opening ceremony ganap na 4 ng hapon na pangungunahan ni PSC Chairman Butch Ramirez, habang panauhin sina Sen. Miguel Zubiri, author ng batas na nagluklok sa arnis bilang national sport, gayundin si Dumaguete City Mayor Felipe Antonio “Ipe” Remollo.

Nakatakdang paglabanan ang mga event na athletics, archery, arnis, badminton,baseball, boxing, basketball, chess, dancesport, karatedo, lawn tennis, sepak takraw, pencak silat, swimming, softball, table tennis, taekwondo, table tennis at volleyball.

Inaasahan ding bibigyan ng pagkilala si Malaysia Southeast Asian Games silver medalist Nicole Tagle, 15, tubong Dumaguete at unang Pinay na kwalipikado sa 2018 Youth Olympic Games sa Buenos Aires, Argentina. Ang Batang Pinoy Games ay bahagi ng pinalalakas na programa sa grassroots level ng PSC na nabigyan pansin ng United Nations Educational, Scientific and Cultural Organization bilang isang matibay na national policy.

Naunang isinagawa ng Luzon regionals sa Vigan, Ilocos Sur may dalawang linggo na ang nakalilipas.

Ipinagpaliban naman ang Mindanao regionals bunsod ng gusot sa Marawi City, habang itinakda ang National Finals sa Pebrero sa susunod na taon.