KONTRA PIRATA
4 na radar station vs nakawan, kidnapping sa Sulu, sasagutin ng Japan
TOKYO ( Reuters) – Magtatayo ang Japan ng apat na coast guard radar station sa mga isla sa Sulu Celebes Seas, na naghihiwalay sa Pilipinas at Indonesia, upang tulungan ang bansa kontra sa pagnanakaw at pagdukot ng mga pirata.
Ayon sa dalawang mapagkakatiwalaang source, posibleng sa susunod na linggo ay lagdaan na ni Pangulong Rodrigo Duterte at ni Japanese Prime Minister Shinzo Abe ang kasunduan sa pagpopondo sa mga pasilidad at pagkakaloob ng pagsasanay sa Philippine Coast Guard ( PCG) kaugnay ng nasabing hakbangin.
“The seas in that area are an important waterway for merchant ships traveling to Japanese ports,” sinabi ng isa sa mga taong sangkot sa pagbuo ng plano. Nakiusap ang mga source na huwag silang pangalanan dahil hindi siya awtorisadong magbigay ng pahayag sa media.
Sa 30 pambibiktima ng mga pirata sa unang anim na buwan ng 2017, anim ang ginamitan ng armas, at tatlo sa mga ito ang nangidnap ng mga tripulante sa Sulu Celebes Seas, ayon sa Regional Cooperation Agreement on Combating Piracy and Armed Robbery against Ships in Asia ( ReCAAP). Nakapagtala rin ng apat na tangkang kidnapping.
Ang pagpapatayo ng Japan ng mga radar station ay gagamitan ng pondo mula sa Overseas Development Aid ( ODA) nito, ayon sa mga source.
“Japan is aware of the need to counter piracy in the region and is keen to help, but we can’t discuss individual projects,” sabi naman ng isang opisyal sa Ministry of Foreign Affairs ng Japan, na nangangasiwa sa paggastos ng ODA.
Sa Lunes bibiyahe si Prime Minister Abe patungo sa Pilipinas para dumalo sa Association of Southeast Asian Nations (ASEAN) Summit and Related Meetings.