MABUTING BALITA

Rom 16:3-9, 16, 22-27 ● Slm 145 ● Lc 16:9-15

Sinabi ni Jesus sa kanyang mga alagad: “Sinasabi ko sa inyo: gamitin n’yo ang di matuwid na Perang-diyos para magkaroon ng mga kaibigan para sa pagkaubos nito’y tanggapin naman nila kayo sa walang hanggang mga tahanan.

“Ang mapagkakatiwalaan sa maliliit na bagay ay mapagkakatiwalaan din sa malalaki, at ang di mapagkakatiwalaan sa maliliit ay hindi rin mapagkakatiwalaan sa malalaki. Kung hindi kayo mapagkatiwalaan sa di matuwid na pera, sino ang magtitiwala sa inyo ng tunay na kayamanan? Kung hindi kayo mapagkatiwalaan sa mga bagay na labas sa inyo, sino pa kaya ang magbibigay sa inyo ng atin na mismo?

Walang katulong na makapagsisilbi sa dalawang amo; siguradong kamumuhian niya ang isa at mamahalin naman ang isa pa, o magiging matapat sa isa at mapababayaan ang ikalawa. Hindi kayo makapaglilingkod sa Diyos at sa pera.”

Naririnig ng mga Pariseo ang lahat ng ito. Sakim sila kaya pinagtatawanan nila siya. At sinabi ni Jesus sa kanila: “Ginagawa n’yo ang lahat para magmukhang mabuti sa paningin ng mga tao ngunit alam ng Diyos ang inyong mga puso. At kasuklam-suklam sa paningin ng Diyos ang mataas sa mga tao.”

PAGSASADIWA:

Hindi kayo makapaglilingkod sa Diyos at sa pera.— Wika ni Obispo Julio X. Labayen, “Kapag ang tao ay mukha nang pera, hindi na siya mukhang tao.” Totoo nga naman, nasisira ng labis na pagpapahalaga sa pera ang magandang imahen ng tao na nilikhang kalarawan ng Diyos. Kapag ang tao ay mukhangpera, hindi na rin siya mukhangDiyos.

Maliwanag ang hamon ng ebanghelyo: Huwag pagsamahin ang paglilingkod sa Diyos at sa kayamanan. Huwag gawing Diyos ang salapi. Maaaring may kapangyarihan sa kayamanan ngunit tanging Diyos lamang ang pinagmulan ng tunay na kapangyarihan. Siya lamang ang dapat sambahin.