Vatican, China magpapalitan ng sining para sa pagkakasundo

MAGPAPALITAN ng mga painting, plorera, at iskultura ang Vatican at China sa layuning maresolba ang madalas na hindi nila pagkakasundo sa pamamagitan ng “diplomacy of art”.

Apatnapung obra maestra mula sa Vatican ang ipadadala sa Forbidden City ng Beijing at 40 mula sa China ang ililipat sa Vatican Museums sa unang magkakasabay na art exhibit sa Marso, ayon sa mga art chief mula sa dalawang bansa.

“It will be an event that overcomes borders and time and that unites different cultures and civilizations,” ani Zhu Jiancheng, pinuno ng government-backed China Culture Investment Fund.

“It will strengthen the friendship between China and the Vatican and it will favor the normalization of diplomatic relations,” sinabi niya tungkol sa proyekto, na ang bawat panig ay magbibigay ng obra ng bawat isa.

Naging tensiyonado ang ugnayan ng Vatican at Beijing sa loob ng ilang dekada.

Nahati ang mga Katolikong Tsino sa pagitan ng mga tapat sa Papa — ang tinatawag na “underground Church” — at sa mga kasapi sa Simbahang suportado ng pamahalaan, ang The Chinese Catholic Patriotic Association.

Tinangkang ayusin ni Pope Francis at ng mga sinundan niyang sina Pope Benedict at Saint John Paul II, ang ugnayan sa Beijing. Ngunit lagi itong nabibigo o kaya naman ay nauudlot ang mga kasunduan.

“With no fear and no barriers, beauty and art are truly a vehicle of dialogue,” lahad ni Barbara Jatta, direktor ng Vatican Museums.

“This is the key of the success that we, at the Vatican Museums, love to call the ‘diplomacy of art’,” ani Jatta, ang unang babae na nangasiwa sa mga museo, na tumatanggap ng aabot sa anim na milyong bisita kada taon.

Ang sampung obra maestra ng Chinese artist na si Zhang Yan ay itatampok sa Vatican, bukod sa 30 pang obra mula sa koleksiyon ng pamahalaan ng China na kumakatawan sa iba’t ibang panahon ng kasaysayan ng bansa.