Application sa Senior High voucher, bukas na
Tumatanggap na ang Department of Education ( DepEd) ng mga aplikasyon sa Senior High School Voucher Program (SHS VP) para sa School Year 2018-2019.
Ayon kay Education Secretary Leonor Briones, kuwalipikadong maghain ng aplikasyon ang lahat ng Grade 10 completers ng SY 2017-2018 na naka-enroll sa mga pribadong paaralan na kinikilala ng DepEd, at hindi Educational Service Contracting (ESC) grantees.
Maaari silang mag-aplay nang manu-mano hanggang Enero 31, 2018, at sa Online Voucher Application Portal (OVAP) sa http://ovap.deped. gov.ph hanggang sa Pebrero 28, 2018.
Inanunsiyo rin ni Briones na kuwalipikadong mag-aplay sa SHS VP ang mga mag-aaral na kumuha ng Alternative Learning System (ALS) Accreditation and Equivalency (A&E) test at ng Philippine Educational Placement Test ( PEPT), ngunit kinakailangang pasado at sertipikado sila para kumuha ng Grade 11 sa SY 2018-2019, at natanggap ang kanilang certification bago ang Mayo 31, 2018.
Maaari nilang isumite ang kanilang aplikasyon hanggang Hunyo 15, 2018.
Ipinaalala ng DepEd na ang lahat ng public school Grade 10 completers, mula sa public junior high schools (JHSs) at state at local universities and colleges (SUCs/LUCs), at lahat ng private school Grade 10 completers na ESC grantees, ay awtomatikong kuwalipikado sa voucher at hindi na kailangan pang mag-aplay.
Nilinaw ng DepEd na libre ang aplikasyon para sa SHS VP.