Trump, binanatan sa pagkilala sa Jerusalem bilang Israeli capital
WASHINGTON (AFP, REUTERS) – Kinilala ni President Donald Trump ang pinag-aagawang lungsod ng Jerusalem bilang kabisera ng Israel nitong Miyerkules, na nagbunsod ng pagkondena ng buong mundo at mga pangamba sa panibagong pagdanak ng dugo sa Middle East.
Winakasan ng hakbang ni Trump ang pitong dekadang pagkalito ng US sa estado ng Holy City, na kapwa inaangkin ng mga Israeli at Palestinian.
Kinondena ng mga kalaban at kaalyado ang desisyon. Ngunit sinabi ng US president na ito ay nagmamarka ng simula ng ‘’new approach’’ sa pagreresolba sa matinik na IsraeliPalestinian conflict.
‘’It is time to officially recognize Jerusalem as the capital of Israel,’’ ani Trump mula sa White House.
Tinawag ni Palestinian president Mahmud Abbas ang hakbang ni Trump na ‘’deplorable and unacceptable’’.
Nagbabala ang Hamas, ang Palestinian Islamist movement sa Gaza Strip, na binuksan ni Trump ang ‘’ gates of hell on US interests in the region.’’
Tanging si Israeli Prime Minister Benjamin Netanyahu ang nalugod sa “courageous and just decision” ni Trump.
Nagngitngit ang Britain sa hakbang na inilarawan nitong ‘’unhelpful’’ at tinawag ng France na ‘’regrettable.’’ Sinabi ng Germany na hindi nito sinusuportahan ang desisyon.
Iginiit ng walong bansa – ang Bolivia, Britain, Egypt, France, Italy, Senegal, Sweden at Uruguay – na magkaroon ng emergency meeting ang UN Security Council. Itinakda ito sa Biyernes.
Sinabi ni UN Secretary General Guterres na mareresolba lamang ang final status ng Jerusalem sa pamamagitan ng direct negotiations ng Israel at Palestinians.
Tinawag ng Turkey ang desisyon na ‘’irresponsible’’ at illegal. Sinabi ng Iran na gagalitin nito ang mga Muslim at ‘’ inflame a new intifada.’’
Binansagan ng Saudi Arabia ang hakbang na ‘’ unjustified and irresponsible’’ -- at taliwas sa ‘’historical and permanent rights of the Palestinian people.’’ Humiling ang Jordan at Palestinians ng emergency meeting sa Arab League.
Nagdeklara ang Palestine Liberation Organization ng strike sa buong West Bank kahapon, habang nanawagan ang Hamas ng ‘’day of rage’’ sa Biyernes.