MABUTING BALITA
Sa simula’y may Wikang-Salita na nga, at kaharap ng Diyos ang Salita, at Diyos ang Salita. Kaharap na nga siya ng Diyos sa simula.
Sa pamamagitan niya nayari tanang mga bagay, at kung wala siya, walang anumang nayari. Ang nayari ay buhay sa kanya, at liwanag ng mga tao ang buhay. Sa karimlan sumisikat ang liwanag at di ito nahadlangan ng karimlan. May taong sinugo ang Diyos—Juan ang kanyang pangalan. Dumating siya para magpatotoo, para magpatotoo tungkol sa Liwanag, upang maniwala ang lahat sa pamamagitan niya. Hindi iyon ang Liwanag, kundi patotoo tungkol sa Liwanag.
Pagkat paparating noon sa mundo ang Liwanag na totoo na siyang tumatanglaw sa bawat tao.
Bagamat nasa mundo siya, at sa pamamagitan niya nagawa ang mundo, hindi siya kilala ng mundo. ‘Isinilang na Siya!’
Siyam na buwan ang nakalipas, noong Marso 25, ipinagdiwang natin ang Dakilang Kapistahan ng Anunsasyon. Ginunita sa kapistahang ito ang pagbabalita ng arkanghel kay Maria, na siya’y magkakaroon ng anak sa sinapupunanniyasaisangmahiwaga at mahimalang paraan, sapagkat lulukuban siya ng Espiritu Santo, at ang isisilang niya—sa mahimalang paraan din, nang hindi bumabawas kundi nagpaparangal sa kanyang pagkabirhen—ay tatawaging Anak ng Kataas-taasan.
Natupad sa araw na ito ang ipinangako ng Diyos kay Maria sa pamamagitan ng anghel. Pagkatapos alagaan ni Maria ang sanggol sa kanyang sinapupunan sa loob ng siyam na buwan, ngayon naman ay maluwalhati niyang isinilang si Jesus sa sabsaban ng Betlehem. Nasilayan ng mga mumunting mga mata ng Sanggol ang daigdig na sa pamamagitan niya ay nalikha— sapagkat siya ay Diyos! Pumaloob sa kasaysayan ang walang hanggan; inihanay ang sarili kung saan may panahon, at espasyo. Ang Diyos ay nagkatawang-tao, upang angkinin ang ating kalikasan, upang tayo ay iligtas.