Faeldon kulong pa rin sa Senado
Sinabi ni Senate President Aquilino Pimentel III na ang bagong posisyon na ibinigay kay dating Bureau of Customs (BOC) chief Nicanor Faeldon, na idinadawit sa kontrobersiya ng P6.4bilyong shabu smuggling sa ilalim ng kanyang pamumuno, ay hindi magpapalaya sa kanya sa piitan ng Senado.
Tiniyak kahapon ni Pimentel, sa kabila ng pagiging malapit na kaalyado ni Pangulong Rodrigo Duterte, na ang appointment ni Faeldon sa Office of Civil Defense (OCD) ay hindi magbibigay daan para makaalis siya sa kustodiya ng Senado.
Isinailalim si Faeldon sa kustodiya ng Office of the Sergeant of Arms (OSAA) simula Setyembre 11 matapos siyang i-cite for contempt dahil sa pagtanggi na makipagtulungan sa imbestigasyon ng Blue Ribbon Committee sa pagpuslit ng 605 kilo ng shabu mula China.
“The solution to a problem like contempt is to purge yourself of the contempt, not a new appointment or position in government. No effect po yan sa kanyang detention,” paliwanag ni Pimentel text message sa mga mamamahayag.
Samantala, pinasalamatan ni Faeldon si Pangulong Duterte sa pagtatalaga sa kanya bilang OCD Deputy Administrator.
“Buong galang kong tinanggap ang hamon ng Pangulo na muling magsilbi sa bayan. Salamat po,” pahayag niya Twitter kahapon.
Pinasalamatan din niya ang kanyang mga senior na sina Defense Secretary Delfin Lorenzana at OCD Undersecretary and National Disaster Risk Reduction Management Council (NDRRMC) Executive Director Ricardo Jalad “for their warm welcome” sa kanya sa ahensiya.
“Makaaasa po kayo ng aking tapat, malinis at buong husay na paglingkod sa bayan,” paniniyak niya.
TIWALA ‘DI NAWALA
Sinabi ng Malacañang na itinalaga ni Pangulong Duterte si Faeldon sa OCD dahil kailangan ng Pangulo ng isang tao na mapagkakatiwalaan niya sa isang napakahalagang ahensiya tulad ng OCD.
Ayon kay Presidential Spokesperson Harry Roque, pinagkakatiwalaan pa rin ni Duterte ang dating marine captain sa kabila ng mga hindi naresolbang isyu.
“Patuloy pa rin po ang tiwala sa kaniya ng Presidente, at alam ninyo naman po ang appointment iyan talaga ay executive in nature,” ani Roque sa Radyo5.
Ayon kay Roque, naniniwala ang Pangulo na inosente si Faeldon dahil maprinsiyo itong tao.
“Iyan ay miyembro ng Magdalo, so naniniwala ang Presidente na mayroon talagang paninindigan at mayroong prinsipiyo. Kaya hindi siya naniniwala sa ngayon ‘no doon sa mga paratang laban sa kaniya,” aniya.
Iginiit ni Roque na magagampanan ni Faeldon ang mga tungkulin nito sa OCD kahit na nakadetine sa Senado.
“Puwede pa rin siyang magtrabaho kasi policy making naman itong Office of Civil Defense… Kaya naman kasing gumawa ng policy making doon sa loob ng Senado mismo,” paliwanag niya.