Nag-viral na pulis-pulisan, kakasuhan
Kilala na ng Southern Police District (SPD) ang umano’y abusadong driver na unang inilarawang nakasuot ng athletic uniform ng Philippine National Police (PNP) at nag-viral sa social media ang pagkakasangkot nito sa away-trapiko nitong Disyembre 27.
Kinilala ni SPD Spokesperson, Supt. Jenny Tecson ang driver na si Joseph Philip Lu Bautista, 36, FilipinoChinese, business consultant ng REFA company Hong/Taiwan, nakatira sa Aventine Town House, Barangay Ususan, Taguig City.
Sa ulat na ipinarating sa SPD ng Taguig City Police, naganap ang insidente sa Bonifacio Global City (BGC) sa lungsod, dakong 6:00 ng gabi.
Nakunan ng video ang pakikipagtalo ni Bautista sa isang hindi pa pinangalanang motorista sa lugar.
Inamin ni Bautista sa awtoridad na siya ang nasa viral video at nilinaw na hindi siya pulis.
Katwiran ni Bautista, “mas kumportable” suotin ang PNP athletic shirt.
Patuloy na tinatawagan ang complainant upang makapagsampa ng kaukulang kaso laban kay Bautista.
Sakaling hindi isulong ng complainant ang pagsasampa ng kaso, maaari namang maghain ng demanda, bilang nominal complainant, ang Taguig PNP ng Illegal Use of Uniform sa ilalim ng Article 179 ng Pevised Penal Code (RA 3815) laban kay Bautista.
“The Philippine National Police (PNP) is currently observing Oplan Tamang Bihis for the proper wearing of uniforms and the PNP has authorized exclusive distributors or providers,” ani Supt. Tecson.