Satisfaction rating ng gobyerno pinakamataas simula1989

Nagtala ng pinakamataas na net satisfaction rating ang gobyernong Duterte sa last quarter ng 2017 at nalagpasan ang rekord ng nakaraang administrasyong Aquino.

Batay sa survey ng Social Weather Stations (SWS), isinagawa mula Disyembre 8 hanggang 16, 2017 sa 1,200 respondents, umani ng +70 o “excellent” net satisfaction rating ang pamahalaang Duterte.

Lumutang na 79 na porsiyento ng mga Pilipino ang “satisfied” at 9% ang “dissatisfied” sa general performance ng gobyernong Duterte.

Ito ay 12-puntos at isang gradong mas mataas mula sa “very good” +58 (71% satisfied, 13%) sa third quarter ng 2017 na isinagawa noong Setyembre. Ito na ang pinakamataas na rating sa timbangan ng SWS.

Ang score na ito ng gobyernong Duterte ang pinakamataas na national government rating simula 1989.

Nilampasan nito ang +66 record ng administrasyong Aquino noong Hunyo 2013.

Ang 12-puntos na pagtaas sa general net satisfaction rating ng administrasyong Duterte mula Setyembre hanggang Disyembre 2017 ay itinulak ng bagong record- high net satisfaction scores na natamo sa Mindanao, Metro Manila, at iba pang bahagi ng Luzon, kasama ang matatag na score sa Visayas.

Tumaas din ang net satisfaction rating ng pamahalaan ng isang grado mula sa very good at naging excellent sa class D o sa masa, sa bagong record-high na +71 noong Disyembre, 11 puntos na mas mataas kaysa +60 noong Setyembre. Nalagpasan nito ang naunang record sa class D na +68 noong Setyembre 2016.