Chinese at Malaysian companies interesado sa Marawi rehab
Interesado ang mga banyagang kumpanya mula sa China at Malaysia na makibahagi sa rehabilitasyon ng Marawi City sa Lanao del Sur, iniulat ng Task Force Bangon Marawi (TFBM) kahapon.
Ayon kay TFBM Undersecretary at Housing and Urban Development Coordinating Council ( HUDCC) Secretary-General Falconi Millar kabilang ang mga kumpanya mula sa dalawang bansa sa Asia sa limang grupo na nagpahayag ng kahandaang magsumite ng unsolicited proposals para sa pagbangon ng Marawi City mula sa digmaan.
“We expect about five or six proponents to be submitted on Monday (February 12). That’s the deadline we told them,” aniya sa press briefing sa Palasyon kahapon.
“Foreign companies have signified their intention to participate... [they are] coming from China and Malaysia,’ he added, citing internal communications.
Ipinaliwanag na ng TFBM noong Disyembre, 2017 na hindi magkakaroon ng bidding para sa reconstruction ng Marawi City at ang proposals ng proponents ay isasalang sa Swiss challenge.
“We are not going to conduct bidding. Ang ginawa natin dito, we called all probable developers, bigtime developers, foreign and national, [and] we allowed them to see the most affected area,” sinabi ni HUDCC chairperson Eduardo del Rosario noong Disyembre.
Sinabi ni Del Rosario na ang mga imbitadong developers ay magsusumite ng kanilang unsolicited proposals na ipipresinta sa Cabinet na siyang magdedesisyon kung alin ang pinakamainam para sa Marawi City at isasalang sa Swiss challenge.
Ang unsolicited proposal o bid ay isang written application para sa bago o innovative idea na isinumite sa layuning makakuha ng kontrata sa gobyerno.
Ang Swiss challenge, naman, ay isang uri ng public procurement kung saan inilalathala ng gobyerno ang unsolicited bid o proposal para ito ay tapatan o higitan pa ng third parties.