NBI mako-contempt kay Taguba
Pinagpapaliwanag ng Manila Regional Trial Court (RTC) ang National Bureau of Investigation ( NBI) kung bakit hindi dapat i-cite for contempt ang ahensiya matapos mabigong tumalima sa utos ng korte na ilipat sa Manila City Jail ang customs fixer na si Mark Taguba.
Pebrero 2 nang nagpalabas ng commitment order si Judge Rainelda Estacio-Montesa na nag-aatas sa NBI na ilipat na sa Manila City Jail si Taguba, subalit nananatili pa rin sa kustodiya ng ahensiya si Taguba hanggang ngayon.
Humarap kahapon si Taguba sa Manila RTC Branch 46, na nakaposas ang mga kamay at nakasuot ng bullet-proof vest habang ineeskortan ng mga tauhan ng NBI.
Itinakda ng Manila RTC ang pagbasa ng sakdal kay Taguba sa Pebrero 23, matapos na paboran ni Judge Montesa ang arraignment dahil sa inihaing Motion to Defer Arraignment ng kampo ni Taguba.
Sa ilalim ng Rules of Court, may 60 araw para ituloy ang arraignment simula nang isampa ang kaso.
Samantala, iniutos na rin ng korte ang paglilipat sa Manila City Jail sa consignee ng P6.4-bilyon shabu shipment na si Eirene Mae Tatad, mula sa detention facility ng NBI.
Binigyan naman ng korte ng 10 araw ang prosekusyon upang magkomento sa inihaing motion to quash information ng kampo ni Tatad.
Sina Taguba at Tatad at pitong iba pa ay nahaharap sa mga kasong may kinalaman sa shabu shipment na lumusot sa Bureau of Customs noong nakaraang taon, at nasabat sa bodega sa Valenzuela City.